Пушкин карта: кузе налаш, кушко миен толаш

Пушкин картым кӧлан пуат?

Тиде карта дене тунемше, пашам ыштыше але илышыште шке верыштым кычалше 14-22 ияш самырык еҥ-влак пайдаланен кертыт. Тӱҥжӧ - нунын кидыштышт Россий гражданинын паспортшо да СНИЛС лийшаш.

Пушкин карта виртуальный але пластик гыч ыштыме лийын кертеш.

Виртуальный картым оформитлаш «Госуслуги» порталыште авторизацийым эртыман, смартфоныш «Госуслуги.Культура» приложенийым шындыман да картым лукташ кӱлмым пеҥгыдемдыман. Пластик картым, паспорт ден СНИЛС-ым ончыктен, Почта Банкын пӧлкалаштыже налаш лиеш.

Виртуальный карта дене билет акым интернетыште гына тӱлен кертыда. Кызыт чыла гаяк заведений билетым онлайн ужала, садлан нимогай чарак вашлиялтшаш огыл. Идалык гыч Пушкин картым автоматически уэш луктыт, приложенийыште реквизитшат алмаштеш. А пластик картым уэш лукташ да весым налаш манын, банкыш мияш верештеш.

Ача-ава-влак икшывышт олмеш картым налын кертыт мо?

Ача-ава-влак икшывыштлан «Госуслуги» порталыште регистрироватлалташ да учетный записьым пеҥгыдемдаш гына полшен кертыт. Ты учетный запись почеш икшыве шкаланже картым шке оформитла.

Телефон да моло данный вашталтыныт гын…

Мобильный приложенийыште данный-влак огыт аралалт. Информацийым вашталташ «Госуслуги» порталыште шкендан данныйымат алмаштыман. 

Пластик карта гыч оксам налаш лиеш?

Пушкин карта дене тӱвыра мероприятийлаш гына кошташ лиеш. Тушеч оксам налаш, вес картыш колташ але иктаж арверлан тӱлаш огеш лий. 

Идалык мучаште картысе окса «йомеш», садлан тумарте улшыж дене пайдаланен шуктыман. Январьыште оксам уэш пыштат. Тудым иканаште але идалык мучко изин-изин кучылташ лиеш.

Кушко миен толаш?

Пушкин карта дене тӱрлӧ мероприятийлан тӱлаш лиеш. Уфаште, мутлан, Опера да балет театрын постановкыжым, Национальный симфонический оркестрын концертшым ончаш, музейыш да моло вере каяш лиеш.

Тичмаш спискым «Культура.РФ» сайтысе «Госуслуги.Культура» приложенийыште верештыда. Тидлан «Пушкинская карта», вара «Посмотреть все события» да «Республика Башкортостан» кнопкылам темдалман. Ойырен налында гын, «Оплатить Пушкинской картой» манын рашемдыза.  

Мо сайже, Пушкин карта дене шке кундемыште гына огыл, моло кундемлаштат, мутлан, Москваште, Санкт-Петербургышто да моло вере эртыше мероприятийлаш миен кертыда. Тыгак мемнан элыште лукмо кинофильмым ончашат йӧным ыштыме. Тидлан 5000 гыч 2000 теҥгежым кучылташ лиеш. Но Пушкин карта дене шкаланда гына билетым налын кертыда, пеленда йолташдам пурташ але тудым иктаж-кӧлан пӧлеклаш ок лий.

«Пушкин карта» шотышто лекше йодышлам 8-800-100-06-45 номерыш йыҥгыртен рашемдыза.