Ошвичын толкынжо гай усталык

Пошкырт кундемыште шочын-кушшо Ахмет Асаевым (Ахмет Асылбаевич Асылбаев) шарналтымына годым эн ончычак «Ошвичыжат, йӱксыжат» романже ушыш толын пура. Тудо писатель семын веле огыл шкеж нерген кышам коден. Шочын тудо кеҥежым, но тунам тӱрлӧ амаллан кӧра йыргешке лӱмгечыжым палемдаш йӧн лийын огыл, садлан идалык мучашлан коденыт. Ахмет Асылбаевичын тукымвож родо-шочшыжо, клуб пашаеҥ, туныктышо да тунемше-влак тудын илыш корныжым, могай улмыжым порын шарналтен ойлышт, а марий йылмым туныктышо М.Н. Адылгареева тунемше-влак дене «Ошвичыжат, йӱксыжат» романжым лончылымо гоч писательын усталык пашажым гына огыл, шкенжынат могай айдеме лиймыжым, шочмо вер-шӧржым, шке калыкшым йӧратымыжым, ялжын ончыкылыкшо верч тургыжланен илымыжым почын ончыктыш.

Ахмет Асаев 110 ий ончыч 15 июньышто Дӧртыльӧ районысо Елтек ялыште илыше кресаньык ешеш шочын. Бирск оласе педтехникумым тунем пытарен, Н.К. Крупская лӱмеш Марий кугыжаныш пединститутышто шинчымашым поген. 

Институт деч вара ик жап ВЛКСМ Марий обкомышто инструкторлан ыштен, Параньга педучилищын директоржо лийын, «Марий коммуна» газет редакцийыште тыршен, Марий книга издательствым вуйлатен. 1946 ий гыч МарНИИ-н шанче пашаеҥже-влак радамыш ушнен, а 1961-1972 ийлаште «Ончыко» журналын тӱҥ редакторжылан ыштен. 

Писательын илыш корныжым шарналтымаш Елтек школысо тунемше-влаклан (фотошто) пайдалын да оҥайын эртыш.