Калыклан порсын кумылым пӧлеклыше пайрем

Молан манаш гын тиде пайрем мер да тӱвыра пашаште ойыртемалтше эн сай коллектив-влакым уша, а концертна самодеятельный ден профессиональный артист-влак коклаште икте-весе деч тунемме опытым шарыме проектыш савырнен. Калыклан келшыше шӱлышан чон поянлыкым, моторлыкым, тыматле койышым почын ончыктымаш - тиде мемнан тӱҥ задачына, ты сценыш лекше мурышо-куштышо коллектив-влакын тыршымаш кӱкшытышт. А эше тиде «Чолман» газетым йӧратен лудшо, тудым шарен, пырля ушнен, лым лийде усталык пашам шуктен шогышо марий-влакын пайремышт. Тений, фестиваль деч ончыч эше кум коллективым ойырен налаш манын, Интернет-йӱклымашым эртарышна. Эн шуко йӱкым погышо кум ансамбль гыч фестивальыш логалаш конкурсын кокымшо условийжым иктыже - Шаран район гыч «Ош пеледыш» фольклор ансамбль - сулен керте. Моло коллектив-влак дене пырля тудат пайремнам сӧрастарыше, марий калыкым куандарыше толкыныш ушныш.

Тӱрлӧ модышым, пӧлекым кучыктымаш, чолга мер пашаеҥ-влакым палемдымаш - концертнан поро йӱлаже,  но ты гана эше ик суапландарымаш кумылым ешарышна: марий калыкын чапшым республикыште веле огыл, эл кӱкшытыштат нӧлтышӧ Шаран район гыч предприниматель, меценат Н.М. Давлетовам «Чолман» газетын «Калыкын порсын кумылжо» номинацийже дене палемдышна. 

Нефтекамск олаште Марий тӱвыра фестивальлан волгалтарыше сескемым шарыше артист ден коллектив-влаклан кугу таум каласыме шуэш. Тиде Марий Эл Республикысе Волжск район гыч, тора корным ончыде, чыла нелылыкым сеҥен толшо, усталыкше дене куандарыше «Элегия» мурышо ансамбль (вуйлатышыже Л. Петрова); М. Шкетан лӱмеш Марий национальный драмтеатр гыч Марий Эл Республикын сулло артистше-влак Алина Егошина, Елена Мочалова, театрын музыкальный пашажым виктарыше Светлана Яндукова; Мишкан район гыч «Рвезылык» куштышо ансамбль (В. Янситова) да мурызо-влак Марианна Баязова ден Виктория Шамыкова, Шаран район гыч «Ош пеледыш» (Л. Шамыкаева), Краснокам район гыч «Йогын вӱд» фольклор (Тумерсола, О. Шипаева), «Ӱдыр-влак» куштышо ансамбль-влак (Арлан, В. Шайхатарова);  Нефтекамск ола гыч «Шӱдыргорно» мурышо ансамбль, филармонийысе «Тангаур» калык куштымаш ансамбльын куштызыжо-влак Регина Дорофеева да Динар Зиганов, мурызо-влак Раиса Исанбаева, Татьяна Шакирова. 

Фестиваль деч вара шонкалымаш шочо. Самырык-влакым кызытсе илышыште художественный самодеятельностьыш, мер пашаш ушаш куштылго огыл, маныт. Да, чынак, илыш вашталт толеш. Садлан тыгай пашат, ансамбль-влакат, поснак  яллаште, тӱҥ шотышто илалше еҥ-влак кӱшеш кучалтыт. «Куштылгыжо - ӱстел коклаште» - изинек мемнам тыге туныктен куштышо кувавай-кочай-влакын ойлымыштым кызытат шарнем. Тидат чын. Кеч-могай жапыштат. А теве Тынбай ялын «Рвезылык» коллектившым налаш гын… Ансамбльын лӱмжылан кӧра огыл, а куштымашыштын постановкыжо, содержанийже, комбинацийже да ӱдыр-рвезыже-влакын уло кумылын, яндар вий-куатышт дене рашкалтен але йӱксӧ гай ийын сценыште модын-лоҥын куштымышт уло залын кумылжым вошт тарватыш. Ялысе самородок-влакым чумырен, нуным усталык корныш шогалтен кертше В. Янситова ден З. Баязова гай клуб пашаеҥ-влак улыт гын, самырык-влакымат ушаш лиеш улмаш? Зритель, кеч-могай ийготан але илалше гынат, садак самырыкым ончаш йӧрата…

Артистын, ансамбльын, концертын - кеч-кудыжынат шкенжын аудиторийже лийшаш, тиде - ончаш толшо-влакым чумырышо зал. Нуным ончышо уке але шагал гын… Тек кажныже иктешлымашым ышта. А кунам зрительлан келша, тунам тудо йӧратыме концертыш, йӧратыме да вучымо артист-влак дене вашлиймашке кумылын вашка. Тунам 700 еҥ шыҥыман тӱвыра полатат шыгыр лиеш, билетат ок сите. Нефтекамскысе Марий тӱвыра фестиваль годымсо гай…