Кугу этнографий диктантым возышна

Тестын йодышыжо-влак оҥай улыт. Айдемын тӱня умылымашыже кумда, школышто географийым, биологийым, историйым сайын тунемын гын, логически шонен, чын вашештен кертеш. Адакшым тест-влакым ыштен пытарымек, чын вашмутым ончалын, шкем тергаш йӧн уло. Но мемнан дене качествылан огыл, кугу цифр верч тыршаш йӧратат. Тений кодшийсе деч шукырак еҥ ушныжо манын, диктантым возаш кӱлмӧ нерген тӱрлӧ чатыште уэш-пачаш ушештарат, эсогыл чын вашмутшымат колтат. Тыге диктантым возышо еҥ йодышыжымат лудын ок шого – «шинча кумен» чын вашмутым вич минутышто темдышт лектеш.

Мыят тиде диктантым кумшо ий возем. Ик ганат шӱдӧ баллым поген омыл гынат, шкем тергаш, уш-акылым пойдараш полшышо акцийлан шотлем. Кугу этнографий диктант шуко еҥым ушымо деч посна, элысе тӱрлӧ калыкын уш-акылжым пойдарыше ӱзгарыш савырныже манын, шуко тыршыман. Мутлан, Мишкан районысо Кугу Соказа ял воктенсе Султан Керемет ото нерген моло калыкат палыже манын, тудын фотосӱретше але видеоролик реклама олмеш телевизорыштат, Интернетыштат чӱчкыдынрак койшаш. Тунам мемнан нерген моло калыкат, шкежат шкенан нерген шукырак палена. Кызытсе гай огыл – икшыве-влак шке элысе калык-влакын пайремышт нерген огыл, а йот эл гыч толшо Хэллоуин нерген шукырак ойлат.