Все новости
Тӱвыра да мер илыш
29 Шыжа 2022, 08:31

Выставкым ямдылышна, фолк-урокым эртарышна

10 октябрьыште Марий историй да тӱвыра рӱдерыште Пошкырт кундемын калык сӱретчыже Георгий Калитовын выставкыже почылтын.

Фойеште художникын графика сынан шуко тӱрлӧ пашажым ужаш лийын. Тиде «Марий мифологий» экспозиций да картина-влакын эскизышт, книгалан иллюстраций-влак, курчак театрлан курчак-влакын эскизышт; шарж, портрет, пейзаж да моло. Георгий Гайнияхматович графика йӧн дене веле огыл сӱретлен, ӱй чиямат моткоч сайын кучылт моштен, сандене живописный пашажат ятыр.  

Георгий Гайнияхматович шке жапыштыже Башкортостанын калык поэтше Мустай Карим дене сайын палыме лийын (Икана Мишканыште лиймыж годым тидын нерген шкежат порын шарналтен ойлен ыле.). А тудыжо мемнан сӱретче нерген тыге возен коден: «Отчаянно талантливый Георгий Калитов». Тидым шотыш налын, выставкынам тыгак лӱмдышна: «Отчаянно талантливый художник Георгий Калитов».

Мишканыште Георгий Калитовын сӱретше-влакым 20 октябрь марте ончаш йӧн лийын. Лишыл жапыште нуно Пӱрӧ олашке куснат, вара ончер-влак Салават, Нефтекамск олалаште почылтыт.

 12 октябрьыште  Пӱрӧ оласе тӱвыра полатын сценыштыже  тӱҥалтыш класслаште тунемше йоча-влаклан «Марий калык тӱвыра» фолк-урокым эртарышна. 

Зритель-влаклан ончылгоч тӱрлӧ выставкым ямдылышна. Тиде марий калык нерген да тидын дене кылдалтше книга-влак, марий вургем, сувенир, курчак, тӱран салфетка, пу гыч ыштыме ӱзгар, шӱшер, аралтыш да тулеч моло. Посна ӱстелым семӱзгар-влаклан ойырышна -  шӱвырым, ковыжым, тӱмырым, пуч-влакым, музиканым, шиялтышым, шун шӱшпыкым, олым шӱвырым ончыкташ намийышна. 

Урокым кок кугу ужашлан шелме ыле. Икымше ужашыштыже Пошкырт кундемысе Калык-влак келшымаш пӧрт да тудын филиалже, Мишкан селасе Марий историй да тӱвыра рӱдер, нунын ыштыме пашашт нерген ойлышна, видеом ончыктышна. Тыштак марий калык, этнографий тӱшка, эрвелмарий-влак, калыкын илышыж нерген ойлышна да кумдан палыме марий-влакын лӱмышт дене палдарышна. Тиде Йыван Кырла, Валериан Васильев, Павел Глезденев, Олег Тактаров, Кирилл Михайлов да молат. Вара марий семӱзгар-влак дене келгынрак палдарышна. Шӱвырым ыштымаш, тудын дене шоктымаш, ковыж могай ужашла гыч шога, кузе тудо йоҥгалтеш - чыла тидым изижат-кугужат куанен ончышт. Мучашыште Валерий Садретдинов изирак концертым эртараш полшыш. 

…Урок тӱҥалтыште йоча-влак дене палыме лийме годым «Тыште марий-влак улыт?» йодышым пуэнам. Иктаж 50-60 йоча кокла гыч пелыж наре кидшым нӧлтале. Вара «Шочмо марий йылмыдам паледа мо?» манын йодым. Иктаж 10-шо ужашыжат кидшым ыш нӧлтал дыр. Пӱрӧ олаште тынар марий йоча лиймеке, молан кызытат оласе школлаште марий йылмым туныктымо нерген йодышым огына нӧлтал?

Автор:А. ИБУЛАЕВ, Марий историй да тӱвыра рӱдерын тӱҥ специалистше. Мишкан села.
Читайте нас: