Йошкар-Олам ужын толна

Марий Элын рӱдолаже мемнам порын вашлие, кечыжат мотор, кумылым нӧлтышӧ ыле. Мемнан кокла гыч южына тиде мотор олам икымше гана ужын, садлан миен пурымо гычак, «Магазин - Кевыт», «Парикмахерская - Ӱп тӱредме вер» манын возымо-влакым эскерен, марий шӱлышым шижмыла чучын.

Автобус дене «Вирджиния» унагудыш миен шуна. Мемнам землякна, Качмаш ялын шочшыжо В.В. Васюков порын вашлие. Гидна Лариса Шатарова олан исторический верлажым ончыктен кондыштарыш. Мыланна Йошкар-Олан рӱдӧ верже (Тудым калык «Диснейленд» манын лӱмден.) келшыш. Тыгак Европысо стиль дене чоҥымо пӧрт да Какшан гоч пыштыме мотор кӱвар-влакым, ты эҥерыште пуш да катамаран дене коштшо-влакым, черке-влакын тӱжвал сыныштым ончышна. А шагатан башне, кушто палемдыме жаплан сем почеш Иисус Христос да 12 апостолжо койыт, эн чот ушеш кодо, манаш лиеш.    

Кокымшо кечын, Калтаса могыр мотор тувырна-влакым чиен, «Подкогыльная» рестораныш погынен мийышна. Тыште марий подкогыльым тамлышна, куштышна-мурышна, гиднам Санкт-Петербургыш ужатышна. Какшан сер воктене коштмына годым М. Шкетан лӱмеш театрын директоржо Э.А. Юзыкайным, мурызо Зоя Берниковам вашлийна. Куанен ойласен, шарнен илашлан пырля возалтна. Эрик Алексеевичын темлыме почеш театрын актрисыже Алена мыланна марий театрым, музейым ончыктыш.

Кастене Шкетан театр воктенсе уремысе сценыште «Шӱдыр йӱр» концертым ончышна, шкенан вел сем почеш мурен куштышна. Мемнан дене пырля  землякна-влакат йывыртен кушташ лектыч.

Марий Элыш миен коштмына чылаланнат пеш келшыш. Ме, пенсионер-влак, тыгай путешествийыш икымше гана гына миен огынал. «Башкирское долголетие» программа почеш Санкт-Петербургышто, Уфаште, Илиш районысо «Алая роза» оздоровительный комплексыште лийынна. Ончыкыжым Казаньыш каяш шонена.

Моло кугурак ийготан еҥ-влакланат тыланымашна тыгай лиеш. Пенсийыш лекмек, пӧртыштӧ ида шинче. Тӱрлӧ вер-шӧрым, олам ончен, пӱртӱс лоҥгаш лектын коштса, икте-весе деке унала мийыза. Тиде тыланда тазалыкым ешара, илышым шуя.