Муро аршашышт Керей эҥер воктене шочеш

Мурышо да куштышо ансамбльым верысе тӱвыра пӧртын культорганизаторжо В.В. Имаев вуйлата. Коллектив 2011 ийыште шочын. Ансамбльыште мурышо - куштышо ӱдырамаш-влак тӱрлӧ сферыште пашам ыштат, южыжо сулен налме канышыште улеш. Тиде А. Мадиярова, Г. Кандиева, М. Ильбатырова, Т. Имаева, А. Шангареева, С. Баюршина, М. Евсеева, А. Апукова, В. Исиметова. Нуным чылаштымат шочмо калыкын тӱвыраж деке кумылан улмышт пырля ушен шога. Вячеслав Владимировичын мутшо почеш, репетицийыш ансамбльышт дене арнялан кум гана чумыргат, а иктаж пайрем концертлан ямдылалтме годым кажне кечын гаяк погынат. Сценылык вургемым шке вийышт дене ямдылат - ургат, налыт. Ожсо калык вургемыштат уло.   

Ансамбль ялысе клубышто эртарыме ик пайрем, мероприятий дечат ӧрдыжеш ок код. Аван, Ачамландым аралышын, Илалше-влакын кечышт, Шошо да Паша, Ӱдырамаш пайрем, Сеҥымаш кече - ансамбльын участникше-влак кажнышкыже ушнаш тыршат. «Керей сем» фольклор коллективын репертуарыштыже изи огыл верым калык муро-влак айлат. Шукыж годым нуно гармонь сем почеш йоҥгат. Тиде семӱзгар дене семым нунылан вуйлатышышт В. Имаев шкеак келыштара. (Тудо гармонь дене изиж годымак шокташ тунемын.). Концертлашке южгунам Г. Юмаев гармоньчо йолташыже пырля шокталташ толеш. Тугодым нуно иканаште кок гармонь дене семым луктыт. 

Кумылзак ӱдырамаш-влак ансамбльышт дене йӧн лийме годым пошкудо районлаште эртарыме тӱрлӧ мероприятийлаш лектын коштыт. Керей эҥер сер воктене йоҥгышо муро аршашышт дене моло верласе марий-влакымат куандараш тыршат. Шочмо калыкын тӱвыражым, йӱлажым арален кодымаште паша лектышышт нерген ятыр Чап грамот, Тауштыме серыш-влак каласкалат. Тек усталык кумылышт ончыкыжымат шолын лекше памашла шырчен йога да эшеат вияҥеш. 

Актуган ял, Калтаса район.