Марий-влак, кушто улыда?

Теве кумшо гана йыҥгыр йӱк шоктышат, шке веремым муын, залыш пурен шинчым. Тул йӧрыш, да тунамак зритель-влакым театр шӱлыш авалтыш.

Действий азам ыштыме пӧртыштӧ кая. Ик пӧлемыште кийыше ныл ӱдырамашым  икгай куан вуча - чылан ава лийнешт. Лач илыш корнышт гына чылаштын тӱрлӧ…

Мый пел шинчам дене спектакльым онченам гын, весыж дене залыште шинчыше калыкым эскеренам. Эн ондак ик еш шинчамлан перныш, молан манаш гын йырым-йыр марла кутырышо-влак коклаште нуно гына рушла мутланеныт, эше билет ужалыше деч наушникым йодыч. «Тӱвыралан шӱман улыт, театр илышымат ойырен огыт кодо докан», - семынем шоналтышым. 

Залысе калык спектакльым тӱткын ончен гынат, «этикет» манмет ситен огыл: я сото телефон йӱк шокта, я коклаштышт шыве-шыве мутланат. Спектакль жапыште эше тидымат шекланышым. Кушто воштылаш кӱлеш гын, воштылыт. Спектакльысе южо сӱретше чонышкак логалеш, чытен кертде, шинчавӱд шкеак йоген кая. Но ала-молан залыште иктынат шинчавӱдшым шым уж. Чылан шып колыштыт. Ала шке чоныштым почын ончыкташ вожылыт, ала айдемыже чынак торжа лийын пытен, чон кӧргым почын пуымо воштылчыкыш лектеш.

Спектакльже вет шонаш таратыше, «Ончаш толшо-влак, айста шкенам вес могыр гыч ончалына» маннеже. Геройжо-влак, тӱрлӧ ийготан ӱдырамаш улыт гынат, окса верч мом гына ышташ ямде огытыл. Ялысе ӱдырамашыже, ала мыняр-гынат шийвундо логалеш манын, нылымше икшывым ышта. Шке капшым ужалкалыше ӱдыр аважым чер деч утарынеже. Икте-весым умылен, ваш пагален илымаш огыл, окса ончылно кая. Кызытсе илышыште оксат огеш лий гын, тыйым айдемыланат огыт шотло. Автор, очыни, тыге каласынеже улмаш: кеч-могай туткарыш логалат гынат, эн тӱҥжӧ айдеме лийын кодман.

А мыйын вуйыштем эре ик йодыш пӧрдын - молан тыгай кугу олаште калык шагал погынен? Марий дискотекыште сем почеш кадыргылаш, аракам йӱаш да тамакым шупшаш чылан мастар улыт, калыкшат шуко погына. А тыгай келгын шонаш таратыше спектакльыште еҥ шагал. Ала чылан йогыланен пытеныт, ала «Тушто мом кычалам?» манын шонат. Калыклан спектакльым шукырак ончыктат гын, тӱвыранат кӱшкӧ нӧлталалтеш ыле дыр, тунам ала шинчыше еҥ деке туп дене огыл, шӱргӧ дене каен, шке верышкышт шинчаш тӱҥалыт гынат, таум каласена ыле. 

А те молан спектакльым ончаш миен огыдал? Миенда гын, шкаланда могай урокым налында?