Монарыште - ямле пайрем

Пайремым ямландараш пошкудо Нерге, Пекшек, Корак, Андреевка ялла гыч мураш-кушташ йӧратыше, пеледыш гаяк мотор уна-влак толыныт да мотор деч мотор пеледышым, тудын дене сылнештарыме тамле кӧстенечым, мурым, куштымашым конденыт. А пайремыште тӱрлӧ конкурсышто таҥасаш, ыштыме пашаштым аралаш кӱлын.

Тиде кечын залым моторын сӧрастареныт. Ик могырышто кидмастар-влак Г. Минилбаеван, Е. Васингинан, С. Михайлован, А. Сайфутдинован, М. Мильбаеван, Э. Пикулаеван тӱрлӧ материал гыч ыштыме пеледышышт шинчам куандарен. Вес велне конкурсант-влак Э. Байметован, Д. Иманбаеван, Т. Бикташеван, уна-влакын ямдылыме кочкышышт, букетышт, композицийышт моторын койын шинченыт. Лӱмыштат сылнын йоҥген: «Рвезылык», «Чодырасе лыве-влак», «Ал симфоний», «Йӧратымаш тулшол», «Узьмак лук», «Шыже кечыйол» да молат. Икманаш, кажнын тыршымыже чыла еҥын шинча ончылно ыле. Жюрилан сеҥышым ойыраш неле лийын, но, чыла конкурсым аклен, Гран-при дене Нерге ялын «Ӱжара», I степенян диплом дене Корак ялын «Рвезылык» ансамбльыштым, II степенян диплом дене Т. Бикташевам да Монар СДК-н «Пеледыш аршаш» образцовый ансамбльжым, III степенян диплом дене Пекшек гыч С. Валиевам палемденыт. Моло участник-влакланат Чап грамота ден пӧлекым кучыктеныт.

Могай пайрем «Кандыра» деч посна? Юрий Иликаев тальянкыжым шупшылеш гын, йолет шкеак кушташ луктеш. Мучашлан чылан ваш келшымаш «Кандырам» куштеныт.

Пайрем чылалан келшен. Тыгай сай мероприятийым эртарыше клуб пашаеҥ-влак И. Янситовалан, Н. Султанбаевалан, Н. Михайловалан, Ю. Иликаевлан, И. Иликаевалан, толшо уна да участник-влаклан, «Ший памаш» ансамбльын ешыжлан, жюрилан таум каласена да пеҥгыде тазалыкым, кужу ӱмырым тыланен кодына.