Все новости
Тӱвыра да мер илыш
23 Сорла 2022, 16:27

Театр - калыкын чурийже

Кушто да кунам марий спектакльым ончаш лийме нерген афишылаште палемдыме «театрын корныжым» ужын, «А мемнан районыш, мемнан ялыш огыт тол мо?» манын йодшо-влакат лектыч. Молан марий театральный артист-влак дене шуэн вашлийына - тидын нерген М. Шкетан лӱмеш Марий кугыжаныш драме театрым вуйлатышын зритель-влак дене пашам ыштыме шотышто алмаштышыже Елена ГРИШИНА дене газетын тӱҥ редакторжо Игорь ГУБАЕВ мутланен. Елена Андреевна гастрольым виктарыме сомыл-влакым ончылгоч рашемден лекташ шонымо кумыл дене мемнан республикыш толмыж годым редакцийышкына унала пурен ыле.

М. Шкетан лӱмеш Марий кугыжаныш драме театрын сайтше гыч налме фото. «Ава капитал» спектакль гыч ужаш.
«Ава капитал» спектакль гыч ужаш. Фото:М. Шкетан лӱмеш Марий кугыжаныш драме театрын сайтше гыч налме фото.

Е.Г.: Марий-влак илыме кундемыш гастроль дене лектын кошташ кумылна эре уло. Но шонымо семын кызытсе илышыште чылажымат шукташ ок лий. Окса чӱдылык чаракым ышта. Тора корныш коштмын роскотшо кугу, чӱчкыдын сеҥаш лийдыме: артист-влакым, декорацийым шупшыкташ посна транспорт кӱлеш, кочкаш-йӱаш, илыме верлан тӱлаш да тулеч моло шотлен пытарыдыме йодышлан шийвундым ситарен шукташ ок лий…

И.Г.: А тений кузе тарванен кертында?

Е.Г.: «Кугу гастроль» федеральный программылан эҥертен. Тиде проект кӱшеш тений театрын тичмаш труппыжым - технический службын пашаеҥже-влак дене пырля чылаже 45 еҥым - тендан республикыш кондена. Районлаште икмыняр вере модын ончыктымо деч посна Уфаште шкенан театрысе стационар условийыште шындыме гаяк спектакльым модаш чыла йӧн уло, тидлан Руш драмтеатрым ойырен налынна. Тысе марий-влакат Йошкар-Оласе театрыште ончымо гаяк тичмаш декорациян чапле спектакльым аклен кертыт. Тыге ончыкташ лийме условиян театр районлаште уке, Уфаште гына. 2019 ийыште гастроль дене толмына годым «Нур» театрыште спектакльым шынденна ыле.

И.Г.: Кунам да могай постановкым Уфашке кондеда?

Е.Г.: «Ший Пампалче» мюзиклым 14 сентябрьыште ончыктена, эрлашыжым кечывалым «Три сестры» йомакым модына, а кастене «Кырла. Путевка в жизнь» спектакльым шындена.

И.Г.: Тугеже, репертуарыштыда рушла спектакль-влакат улыт?

Е.Г.: Да. Марий-влак гына огыл, моло-влакат ончен кертыт.

И.Г:. А районлаште?

Е.Г.: Уфа деч вара Мишканыш, Калтасаш, Нефтекамскыш, Бирскыш «Ава капитал» спектакльым намиена. Тиде 16-19 сентябрь кечылаште лиеш.

И.Г.: Марий театрын артистше-влак нигунам тынар шукын толын огытыл, уло труппым тарватыме. «А мемнан деке кунам толыда?» манын йодшо-влаклан мом вашештеда?

Е.Г.: Чыла вереат шуына ыле, эсогыл яллашкат…

И.Г.: …Ожнысо гай?

Е.Г.: Да, тунам спектакльым ончаш шукын коштыныт. Билетым ужаленак, чыла роскотым петыраш лийын. Зритель лиеш гын, театрат илаш тӱҥалеш. Кызытсе саманыште йодыш лач тыге шога. Ме шкеже - администраций да артист-влак - театр искусствым шарен, вияҥден шогаш манын, чыла ыштена, но тиде гына шагал. Калыкым искусство гоч воспитатлен шогаш, айдемын чонжым пойдараш, уш-акылыштыже шонкален-вискален моштымаш ойыпшым ынже йомдаре манын тыршаш гын, тыште театрын рольжо пеш кугу. Но спектакльым, театральный артист-влакым йӧраташ изинек туныктен куштыман. Ешыште, школышто, мер илышыште… Марий интеллигенцийын, туныктышын, журналистын, тӱвыра да мер пашаеҥын, ача-ава-влакын да молынат тиде проблемым ужын моштымышт да виктараш полшымышт деч пеш шуко шога. 

И.Г.: Но тендан артистда-влак шкеныштым театральныйлан шотлат гынат, коклаштышт тугай мурызо-влак улыт… Марий эстрадыште профессионал мурызо семын сценыш лекше-влак коклаштат тыгай йӱкан-влакым эше кычал ончаш кӱлеш. Ала мый тӱргоч каласен колтышым?

Е.Г.: Уке, уке! Чыла чын. Спектакльым ончаш мийыше-влак нунын вокал талантыштымат аклен кертыт. «Ший Пампалче» мюзиклыште, мутлан, тӱҥ роль-влакым Марина Воронцова, Иван Соловьев, Иван Смирнов модыт, а нуно пеш чаплын да мастарын мурат.

И.Г.: Иван Смирнов мурызо семынат шукертак кумдан палыме. Чаманаш логалеш, молыштын муро поянлыкыштым, можыч, Йошкар-Олаште, Марий Элыште палат, но мемнан кундемыште… Ӱмаште «Чолман» газетнан юбилей пайремышкыже Иван Соловьевым ӱжынам ыле (Тау театрын вуйлатышыже-влаклан пеш шыгыр паша жап коклаште артистым колташ йӧным муын кертмыштлан.). А мемнан мероприятийлашке марий-влак гына огыл коштыт. Вот тунам ийготым погышо ик руш ӱдырамаш концерт деч вара мылам тыге мане: «Ах, как он поет! Как поет! Мощный, красивый, звонкий голос, до глубины души пробирает! Аж влюбилась в вашего Ивана!» «В вашего» мутшо  тендан, марий-влакын, манмым ончыкта. А марий-влак гын «Мемнанат тыгай марий мурызына-влак улыт мо?» манын ӧрын колыштыныт. Тендан театр гыч мурызо тӱшкам посна гастроль дене ӧрдыж кундемысе марий-влак деке колташ гын…

Е.Г.: …Пеш сай шонымаш. Но театрысе паша - нунын профессиональный илышышт, вийыштым, ӱнарыштым пӱтынек тудлан пуат. Мурызо семын лектын кошташ нунын жапыштат уке. Юмылан тау, кеч южгунам тыге, тӱрлӧ программылан але грантлан эҥертен, торасе кундемлашке марий-влак деке коштын савырнен кертына. Спектакльым йӧратыше-влак ончыкыжым ешаралтыт, да гастрольнам чӱчкыдынрак эртараш, тудым концерт шӱлыш денат пойдараш тӱҥалына манын ӱшанен кодына.

И.Г.: Тау унала пурымыланда, усталык корныда калык дене эре ушнен шогыжо!

Автор:Игорь Губаев
Читайте нас: