Шочын-кушкын ик вере, ӱмыр эрта вес вере…

- Школышто тунемме годымак мураш, кушташ йӧратем ыле. Пӱнчер клубышто мурышо да куштышо ансамбль лийын. Тушко ялысе рвезе-влак дене кушташ коштынам. Анна Байбулатовалан школышто тунемме годым мураш туныктымыжлан, а Алексей Ивановлан тӱвыра тӱняшке ошкылым ышташ полшымыжлан таум каласем. А эше паваем-влак, Олег ден Юрий Иркабаевмыт, тӱвыра аланыште пашам ыштеныт. Мыят нунын корно дене каяш шонен пыштенам. 

Кызыт Артем Иркабаев Марий самырык театрыште пашам ышта. Шуко кугу рольым ӱшанен пуат. Йоча-влаклан йомакым, школ программа дене кылдалтше спектакль-влакымат модыт. Пашажым аклен, тудым Марий Эл вуйлатышын Тауштымо серышыж дене палемденыт.

Тыматле, весела, пеҥгыде вий-куатан рвезын койыш-шоктышыжо чыла еҥынат кумылжым савыра. А сценыште мурен-кушталта гын, мален кийыше еҥымат тарвата.