Пошкырт кундемысе марий ансамбль-влак: «Акарт» мӱндыр кундемлашкат коштеш

Мӱндыр корныш лекташат огына ӧр да огына ӧркане манын кертам. Тыгодым мурымо дене гына огына серлаге, йот кундемым, историй дене кылдалтше верламат ужын толаш тыршена. Эн кужу корным 2015-ше ийыште Коми Республикыш «Завалинка» фестивальыш мийыме годым эртышна докан. Тынар ий коклаште чумыргышо Чап грамот ден диплом-влакым шергалын, элын географий картешыже коштмо маршрутнам сӱретлаш лиеш дыр. Мыланна Калык мурым мурышо самодеятельный мурызо-влакын «Завалинка» XII, XVII всероссийский, «Финно-угорский транзит: семейные традиции» сымыктыш да калык творчество тӱнямбал фестивальлаште, фольклор коллектив-влакын «Ший мундыра» фестиваль-конкурсыштышт, Марий Элыште Пеледыш пайремыште, Татарстаныште «Марийская восьмерка» этнофестивальыште, Удмуртийысе Семык пайремыште, Челябинск областьыште регион-влак кокласе «Дружба» калык тӱвыра фестивальыште, шкенан республикысе «Кушнаренковские зори», «Кушталташ йодеш чонемже» фестиваль-конкурслаште, VI Тӱнямбал фольклориадыште да моло мероприятийлаште налме тӱрлӧ кӱкшытан дипломна-влак шерге улыт».

В.И. Хамитовын шкенжын чоныштыжо вӱчкен куштымо «шочшыжо» - ынде икмыняр ий почела тарватыме «Шокталте, шокталте» пайрем нергенат каласен кодынем. Тудым Ардаш клубышто але олыкышто район мероприятий семын эртарат гынат, шукертак ятыр район ден кундемын тӱрлӧ семӱзгар дене устан шоктышыштым да мурызыштым иквереш чумыра. Тушто Марий Элын, Удмуртийын, Татарстанын, шкенан республикысе тӱрлӧ районла гыч мийыше коллектив-влак мастарлыкыштым ончыктеныт да  погынышо калыкым мурыктеныт-куштыктеныт.

Ялыште школ, тӱвыра пӧрт пашам ыштат гын, ончыкылан ӱшан уло, илаш каньылырак да куанлырак. А кеч-могай тӱвыра пӧртын коллективше, нунын радамыште «Акарт» ансамблят мер илышыштат тӱҥ эҥертыш улыт.