«Чолман» газетлан - 30 ий

30 ий - кумло ошкыл гына огыл.

«Чолманын» йыргешке лӱмгечыжлан пӧлеклыме пайрем концерт 16 апрель кастене тӱҥале. Но ончыч саламлаш толшо уна-влак дене палыме лийына. Нефтекамск ола администраций вуйлатышын икымше алмаштышыже Э.С. Валидов газетын пашаче ешыжым да погынышо калыкым шокшын саламлыш, администраций вуйлыкын тауштымо серышыжым да Чап грамотым кучыктыш. Марий Эл делегаций пеш поян пӧлек-влакым конден, книгашт ден материалышт редакцийын пашаштыже кучылташ, тӱвыра, литератур илышым вияҥдашна пеш кӱлешан да шерге улыт. Марий Эл Республика Правительство Вуйлатышын икымше алмаштышыже М.З. Васютинын секретариатшым вуйлатыше Э.В. Чемышев, «Кугарня» кугыжаныш унитар казна предприятийын директоржо Э.А. Иманаев, Марий самырык театрым вуйлатышын алмаштышыже Е.А. Иванова погынышо калыкын кумылжым савырышт. Башкортостан Республикысе Кугыжаныш Погын - Курултайын депутатше Я.А. Кугубаев ты кечын Москош кайымыжлан кӧра пайремышкына толын ыш шу, садлан тудын лӱм денат, тыгак Мишкан да Бирск районласе администраций вуйлатыше, тусо марий-влак деч порым тыланыме да шокшын саламлыме шомак-влак дене пырля пӧлек-влакым Мишкан райсоветын председательже, Бирск оласе «Аргон» ООО-м вуйлатыше В.А. Сабиров кучыктыш. Краснокам районысо «Эрвел марий» тӱвыра автономийым вуйлатыше Р.А. Сатаеван лӱмжӧ дене тиде организацийысе правленийын еҥже Л.В. Алынбекова, Шаран-влак лӱм дене Н.М. Давлетова да Г.Е. Ахметшина саламлышт. Мутат уке, зал гыч шке кумылын сценыш кӱзен саламлыше-влакат шукын ыльыч.

Мемнан концертыште ик ганат ӧрыктарыше тат деч посна ок лий. Эн тора вер гыч толшо зрительна ты гана Хабаровск ола гыч ыле! Кузе тыгай уналан пӧлекым от кучыкто! Римма Пайкиева шуэн, тӱҥ шотышто кеҥежым гына, шочмо кундемышкыже пӧртылеш. Нигунам марий концертым ончен огыл, садлан, «Чолманын» юбилей концертше лийшашым пален налынат, ты гана шошым, лӱмын мемнан пайремышкына толын!

Пайрем кумыл - пӧлекым налмаште веле огыл. Тӱвыра, туныктымо, мер пашаште лым лийде тыршыше чолга еҥна-влакымат палемдыман. Тыге газетлан полшен шогышо, возышо, подпискым ышташ кумылаҥдыше штатыште шогыдымо авторна-влакланат пайремыштына уло кумылын пӧлекым кучыктышна. Тиде А. Васинкина (Янаул район), Г. Ахметшина (Шаран район), А. Юзукбаева, И. Захарова, А. Иванова (Мишкан район). Мотор-мотор марий вургемым чиен толшо, куштымаш да модмаште шкеныштым чолган ончыктышо-влакынат пӧлекым налмыштлан кумылышт нӧлтын, шонем.

Концерт калыклан келшен. Тидыже эн тӱҥ. Мом ыштена гынат, калыкын чон йодмыжлан келшыже манын тыршена. Тиде гана кӧлан залыште вер ситен огыл гын, Инстаграмыште вияш трансляцийым онченыт да тунамак Интернет гоч пеш шуко поро мутым возеныт. Залыште марий-влак гына огыл лийыныт. Теве UTV телевиденийын журналистше Лилия Ахметова воза: «Спасибо за прекрасный концерт! Танцы - на высоте!» А куштышыжо кӧ? Тиде Нефтекамскысе «Дружба», Мишкан гыч «Эрвел», Краснокам район Йывангасола гыч «Келшымаш» ансамбль-влак. Нине коллектив-влаклан да вуйлатышышт Наиль Садретдиновлан, Ирина Имаевалан кугу тау! «Я влюбилась в Ивана Соловьева, бесподобное исполнение!» - каласыш концерт деч вара руш ӱдырамаш. А Сергей Пакеевше, а Снежана Орлова! «Я не специалист по вокалу, но какой у них тембр, какое виртуозное исполнение на гармошке, как работают на сцене!» - ойла Нефтекамск оласе балетмейстер. Нине артист-влак М. Шкетан лӱмеш марий кугыжаныш драме театрыште, Марий кугыжаныш филармонийыште пашам ыштат, ӧрдыж кундемлашке гастроль дене лектын кошташ жапышт уке, садлан нуным кунам ончаш да колышташ лиеш? Конешне, «Чолманын» концертыштыже! Эше Краснокам район гыч Сергей Зайнитдинов, Мишкан район гыч Юрий Иликаев толыныт ыле - гармоньчо-влакын тичмаш ансамбльыштым туштак чумыраш лие! Кугу таум ойлем «Шӱдыргорно» ансамбльлан - тиде Нефтекамск олаште илыше журналист, туныктышо, воспитатель-влак Л.В. Сайнеева (кудымшо школ), В.И. Давлетгареева (интернат-школ), А.В. Салимянова (36-шо йочасад), Н.Г. Валитова (11-ше йочасад), Э.В. Губаева («Чолман» газет пашаеҥ), И.И. Егорова (медицина пашаеҥ), Н.О. Ахмадиева (образований Краснокам районысо пӧлкан пашаеҥже), Л.Б. Байрамова (Йошкар-Оласе тӱвыра да сымыктыш республиканский колледжын выпускникше).

Мурымыштым Йошкар-Ола гыч толшо специалист-профессионал, зритель-влакын кӱкшын аклымыштлан веле огыл, мер пашам шке ӱмбакышт налше, чыла сомылым икганаште шуктен шогышо чолга ӱдырамаш-влак семын нуно пагалымашым сулат. Садлан ме редакцийыште шагалын улына гынат, ме шукын пашам ыштена манын ойлем, полышкалышына-влакын вийыштлан эҥертена. Тиде - лудшына, туныктышо, артист, спортсмен да моло чолга марий-влак. Погынен эртарен колтымо пайремнат тидым пеҥгыдемдыш. Посна таум каласынем Бирск ола гыч спонсор семын полшышо-влак Д.И. Ибашевлан, В.А. Сабировлан, Т.А. Бакиевалан, В.Н. Андреевлан, А.А. Илиевалан, Мишкан район гыч В.Н. Зайниевлан, пӱрӧ-влакын «Виче марий» калыкле тӱвыра автономийыштлан, Шаран гыч Н.М. Давлетовалан. Пӱрӧ марий-влакын автономийышт спонсор семын веле огыл полшыш, а эше «Чолманлан» пӧлекым ышташ кумылан тӱрлӧ кундемыште илыше еҥ-влакым шке йырже чумырыш, Алена Андреевна Илиева тиде пашам координироватлыше семын кугу нелытым шке ӱмбакыже нале. Кӧ полшен, кӧ ушнен, лӱмыштым вес номерыште ончыкташ шонена. Мишкан районысо марий йылмым туныктышо-влаклан вуем савем. Коклаштышт каҥашен, пӧлекым налаш оксам погеныт. Ӧрыктареныт да куандареныт. Тау тыланда! Пайремым чаплын эртараш полшымыжлан Мишкан район администраций вуйлатыше П.В. Трапезниковлан, Йошкар-Ола гыч артист йолташна-влакым поген толмыжлан Самырык театрым вуйлатышын алмаштышыже Е.А. Ивановалан редакций, лудшына да эрвелмарий-влак лӱм дене уло кумылын тауштем!

Лач ты кечылаштак, 16-17 апрельыште, Красноусольскышто республикысе национальный СМИ-влакын форумышт эртыш. Садлан мылам пайрем деч вара йӱдым тушко тарванаш да кокымшо кечынже тушто пашам ышташ логале. Форумым иктешлыме ужашыш Республикын Вуйлыкшо Р. Хабиров мийыш. Ойлымыж годым Р. Хабиров тыгай задачым шындыш: яллаште шочмо йылмыштым мондаш тӱҥалыныт, икшыве-влак рушла кутырышо лийыныт. Чыла калыкынат сӱрет икгайрак. Арамлан огыл журналист-влакын форумышкышт мер представитель-влакымат ӱжыныт ыле. «Нунат, верлашке лектын, калык дене пашам ыштышаш улыт, тиде сомылым пырля шуктыман», - мане тудо. Тидын дене мыят келшем, мер организаций-влакын пашашт кагазыште гына лийшаш огыл. Но оҥайже да ӧрыктарышыже мылам ончылно лийын. Р. Хабировын кидше гыч Башкортостан Республикын Чап грамотыжым налмылан гына огыл (Конешне, тидыжат куандарен, садлан мыланем йӱдымак корныш лекташ темленыт.). Наградым кучыктымыж годым моло дене мутым ыш вашталте, а мый дечем йодо: «Тиде вашлиймашын значенийже могай, пайдаже уло мо?» Тудын дене вес кутырымаш уремыште лие. Пырля войзалтме годым адак йодышым пуыш: «Мишканысе историй да культура рӱдер кузе пашам ышта?» Вара шоналтышым: «Нигӧ дене ыш кутыро, нигӧлан йодышым ыш пу, а мылам кок гана кутыраш логале. Тугеже, марий-влак дек посна тӱткыш уло, республике Вуйлыклан ме ӧрдыж калык огынал. Тугеже, ушнен моштымо вийнам огына шалате, умбакыже вийналтын, рыҥ тошкалын ошкылына, калыкнан лӱмнержым нӧлтена». Тау эше ик гана чылалан, кӧ мыланна полшен, кӧ мыланна ӱшана!

Н.Еруслановын фотожо-влак.

Читайте нас:

Новости партнеров

Владимир Путин поздравил жителей Башкирии и её столицы с 450-летием Уфы

Владимир Путин менән Радий Хәбиров эш осрашыуы үткәрҙе

"Спорт - милләтара диалог һәм тынычлыкны ныгыту коралы"

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».