Все новости
Тӱвыра да мер илыш
27 Пургыж 2020, 18:18

Шочмо йылмын кечыжым пайремлышт

21 февральыште тӱнямбалне Шочмо йылмын кечыжым пайремлат. 25 февральыште Нефтекамск оласе латкокымшо школышто тиде кечылан пӧлеклыме «Ме ешыште шочмо йылме дене мутланена» конкурс-фестивальым эртарышт.

Тушто шке калыкыштын йылме, тӱвыра да чон поянлыкыштым кандаш еш ончыктышт. Руш калык тӱвыра дене залыш погынышо уна-влакым Косотухинмыт еш (9-ше школ), татар калыкын илыш йӱлаж дене Давлетовмыт (11-ше школ), Яримовмыт (10-шо школ), Султановмыт (12-шо школ), Вильдановмыт (14-ше школ) еш-влак, башкир калыкын тӱвыра ойыртемже дене Мусинмыт (7-ше школ) еш-влак палдарышт, марий калыкын тӱвыра поянлыкшым Захаровмыт (2-шо школ) да Александровмыт (4-ше школ) еш-влак моторын почын ончыктышт. Шочмо йылме пайремыште еш-влак сценыште шке тукымвожышт, ешыштын оҥай йӱлаже-влак, калыкыштын тӱвыраже нерген кугешнен да моторын каласкалышт. Кажне еш усталык шӱлыш дене ойыртемалте - икте шочмо йылме дене почеламутым йоҥгалтарыш гын, весе муро да куштымаш дене куандарыш, музикан, курай да моло семӱзгар денат шокталтыш.
Марий еш-влакын - Захаровмыт ден Александровмытын - выступленийыштат сай шарнымашым кодыш. Марла тувырым чийыше ава да нунын икшывышт сценыште моткоч сӧралын койыч. Захаровмыт ешыште Алена Александровна луымшо школышто физкультурым туныкта. Ачашт, Алексей Альбертович, «Башавтотрансыште» водительлан ышта. Коктынат Бирск район Реве ялын шочшыжо улыт. Карина ӱдырышт кокымшо школын кумшо классыштыже, Кирилл эргышт икымше классыште тунемыт. Карина ден Кирилл карате секцийыште заниматлат, Карина тыгак музык школыш коштеш - фортепиано да скрипка дене шокта. Александровмыт еш нылымше школын чапшым аралышт. Авашт, Ирина Михайловна, - Илиш район Анач ялын шочшыжо, оласе ПМПК-ште (психолого-медико-педагогический комиссий) психологлан тырша. Дима эргышт кандашымше классыште тунемеш, грек да рим кучедалмаш дене заниматла. Ульяна ӱдырышт, икымше классын тунемшыже, йоча музык школыш мураш коштеш, скрипка дене шокта. Ачашт, Владимир Ильич, Мишкан селан шочшыжо, строитель улеш. Ирина Михайловна конкурсышто ӱдыржӧ дене руш, марий да пошкырт йылмыла дене мурым йоҥгалтарышт, залысе калыкын кумылжым савырышт.
Шочмо йылме пайремыште чолгалыкым ончыктышо чыла ешлан жюри тӱрлӧ номинацийлаште диплом ден пӧлек-влакым кучыктыш, пайремым ямдылыше латкокымшо школын, тыгак еш-влакым ямдылаш полшышо школласе туныктышо-влакым тауштыме серыш дене палемдыш. Фестивальым оласе «Тангаур» куштышо ансамбль ден «Миллениум» эстрада да акробатический куштымашын образцовый студийже, тыгак кудымшо, латкокымшо школын тунемшыже-влак сӧрастарышт.

Моло фотом тыште ончалаш лиеш.
Авторын фотожо-влак.

Читайте нас в