Марий Басковым паледа?

Виктор Апталиков кызыт талантан, ойыртемалтше йӱкан профессионал мурызо, тенор, семмастар, артист, аранжировщик, продюсер семын палыме. «Юмынӱдыр» марий мюзиклыште тӱҥ рольым модын. «Ял ӱмбалне мужыр йӱксӧ» кинофильмыштат уста рвезылан тӱҥ рольым ӱшаненыт. Кызыт Марий самырык театрыште йӱк режиссёрлан пашам ышта.

Виктор Апталиков Йошкар-Олаште шочын-кушкын. 1-9 классым Йошкар-Оласе 18-ше школышто (кызыт Бауман лицей) тунемын. Ангелина ден Сергей Речкинмытын вуйлатыме «Узоры» йоча образцовый ансамбльыш мураш коштын. 10-11 класслаште 27-ше школышто шинчымашым поген. Школ деч вара И.С. Ключников-Палантай лӱмеш музыкальный училищын вокал отделенийыштыже Марий Элын калык артистше В. Ромашкинын классыштыже тунемын. Шинчымашым келгемдаш манын, Моско оласе ГИТИС-ын музыкальный театр факультетышкыже пурен. Москонцертын артистше лийын. Тушто пашам ыштыме жапыште Москошто эртаралтше кугу кӱкшытан ятыр концертыште руш да йот йылмыла дене романсым, Совет жапысе семмастар-влакын мурыштым йоҥгалтарен. Тылеч посна шуко йот элым: Чехийым, Польшым, Германийым, Турцийым да молымат - ужын. Польшысо Карпач олаште, Литвасе Вильнюс олаште лауреат лӱмым сулен.

Калыкыште Василий Павловын йоҥгалтарыме «Кузе мый тыйым йӧратем» мурыж дене поснак палыме. Кызыт Марий Элыште эртаралтше тӱрлӧ концертыште да мероприятийыште калыкым сылне мурыжо-влак дене куандара. Тудын репертуарышкыже «Кузе мый тыйым йӧратем», «Шӱм теҥызем», «Тый улат мыланем», «Йӧраталме таҥем» (Надежда Пашкина дене пырля), «Йӧратымаш ила», «Кычалам моторем», «Чонемлан шокшо», «Шошо» (Вадим Протасов дене пырля), «Нелеш ит нал», «Келшена, ныжылем» муро-влак пурат.

Шукерте огыл «APTALIK» шоялӱмым налын. Тидым рвезе тыге умылтара: «Мый, ондаксе дене таҥастарымаште, вес сынанрак, кызытсе илышлан келшыше муро-влакым мурем. Садлан вес лӱмым налаш шонен пыштенам. Икана тыгай оҥайыш логалынам. Ме концерт дене яллашке коштынна. Ик кова ӱмбакем тӱткын онча. Мый ӧрынам, мый денем ала-мо лийын, шонем. Жап эртымеке ойла: «Апталикет улат вет!» Тидын деч вара шоналтышым: ковайлан мыйым тыге шарнен кодаш куштылгырак гын, шоялӱмым налман. Эше кугезе кочамын лӱмжӧ Апталик лийын».

Викторым Казахстаныште палат. Тудо YouTube-ышто «Aptalik» каналым вӱда. Икымше видеожо «Кычалам моторем» мурын каверже лийын. Тылеч вара калыклан палыме да нунын йӧратыме руш мурыштлан кавер-влакым серен: «Две зимы, два лета» армийысе муро, А. Чумаковын «Если бы знать зачем», В. Петлюран «Я опускаюсь на колени», Э. Грейын «Девочка моя», Е. Кридын «Самая самая». Тыгак Геннадий Петуховын «Кузе илет, ялем» келге шонымашан мурыжым сылнын мурен да видеош возен. Но «Aptalik» каналым умбакыже вияҥдаш кӱлын. Тыге кумдан палыме талантан, самырык мурызо-влакын мурымыштым аклыме шотан видео-реакций-влак каналым пойдараш тӱҥалыныт. Виктор Апталиков тышке йот элла гыч толшо студент-влакым ушен, тидыже видеолан у тӱсым пуэн. Эн ончыч Индий гыч Акаш Рай дене палыме лийын. Тудын дене Диана Анкутдинован «Реченька» мурым йоҥгалтарымыжлан видео-реакцийым возеныт. Виктор Акашлан марий тӱвыра нерген каласкален, марий муро-влакым колыштыктен. Индиецлан «Кычалам моторем» мурын семже моткоч келшен, эсогыл мутшымат тунемын, гитар почешат муралтен. Шоналташ гына: Индий гыч толшо рвезе марла мура! Эсогыл марий мурым индий йылмыш кусараш кумылжо лектын. Мали республик гыч толшо Бубес Конат дене Д. Анкутдинован вес мурыжлан тыгаяк видео-реакцийым возеныт. Эн ӧрыктарышыже - тиде видеом ик миллион утла еҥ ончен. Кугу сеҥымаш, кугу паша лектыш! Шке реакцийжым Казахстан гыч талантан, уста рвезе Димаш Кудайбергенын, самырык мурызо Даниэля Тулешован мурыштлан войзен. Нине видео-влакымат кажныжым 100 тӱжем утла еҥ ончен. Мо оҥайже, казах йылмыштат «aptalik» мут уло. Тудо «арня» манме лиеш.

Виктор Апталиков - рушла каласаш гын, универсал. Марла, рушла, йот йылмыла дене мура, рэпым лудеш, мурылан шомакым воза, семым шочыкта, аранжировкым келыштара, семӱзгар-влак дене шокта, театрыште, кинофильмыште модеш, YouTube-ышто каналым вӱда. Виян йӱкшылан кӧра тудым чӱчкыдын «марий Басков» маныт. Олаште шочын-кушкын гынат, марий йылмым сайын пала, сайын кутыра. Тудо коча-коважын, ача-аважын шочмо йылмыштым шке кумылын тунемын. Моткоч куанле! Тыгай еҥ-влак тӱняште шагал улыт, кугешнаш веле кодеш.

Мыланемат тиде талантан рвезе дене палыме лияш да кум мурыжлан («Йӧратымаш ила», «Кычалам моторем», «Нелеш ит нал») шомакым возаш пиал шыргыжалын. 13 январьыште Виктор шочмо кечыжым пайремлыш. Тазалыкым, пиалым, йӧратымашым, ешыште вашумылымашым, куаным, усталык пашаштыже лектышым, сылне у муро-влакым шочыкташ тыланем! Марий калыкын лӱмжым кӱшкӧ нӧлтӧ, шке талантет дене чылаштым ӧрыктаре!