Муро, куштымаш да келшымаш иктыш ушышт чыламат

Нефтекамск марий-влакын икияш пашаштым да Марий тӱвыра тылзыштым иктешлыше пайрем шеҥгелан кодо. У ий лишемме вашеш пырля чумырген эртарыме фестиваль кугу да чапле концерт дене веле огыл калыкым Оласе тӱвыра рӱдерыш вашкыкта. Тушко чон лушкымеш каналташ погынат.

Тиде гана кок шагат утла шуйнышо концерт деч ончычак фойеште мурымаш-куштымаш талышныш, а вара калык залыште артист-влакым шулен колышто, нунын дене пырля тӱрлӧ модыш конкурсыш ушныш… «Чолман» газетын чолга авторжо-влак Д. Аплекаевам (Караидель район), Д. Яметовым, М. Гареевам (Мишкан район), Л. Гимаевам (Нефтекамск ола), «Эй, такмакшат, такмакшат…» конкурсышто сеҥыше-влак А. Артамоновам (Калтаса район), М. Ижбулдиным (Бирск район), Е. Шумаевам (Мишкан район) шергакан пӧлек, диплом да тауштымо серыш-влак дене палемдышна. Туштак газетлан возалтше-влакат яра кид дене пӧртыл ышт кай. А ончаш мийышыже-влак… Татарстанысе Нижнекамск ола гычат лийыныт, эсогыл шке ургымо марла тувырыштым чиеныт!

Вашлиймаш кас самырык годсым шарныктыше татымат ӧрдыжеш коден огыл. Ятыр ий ожно «Марий мланде» ансамбльын ешыштыже пырля мурышо-куштышо ончычсо студент-влак Анатолий Козырев Москва, Людмила Эпанаева ден Татьяна Щербакова Йошкар-Ола, Роза Султангараева Октябрьский ола гыч погынен толыныт веле огыл, самырык годсышт гаяк пеш чапле муро аршаш-влакым пӧлеклышт. Йошкар-Оласе И.С. Палантай лӱмеш Марий тӱвыра да сымыктыш колледжын тунемшыже, «Ший памаш» финн-угор эстраде конкурсын тенийсе лауреатше Татьяна Шакировалан шочмо кундемышкыже пӧртылын муралташ поснак кумылло лийын: ӱдыр Краснокам районысо Корий ялеш шочын-кушкын, Нефтекамск оласе йоча музыкальный школышто тунемын. Нефтекамск, Агидель олала, Краснокам район Коян села гыч куштышо коллектив, районла гыч толшо мурышо да фольклор ансамбль-влак (Чылаштым уэш огына ушештаре, нунын лӱмыштым афишыштат ончыктымо ыле.) фестивальым калыкын кумылжылан келыштарен пойдарышт. А Нефтекамск ола гыч нылымше классыште тунемше-влак Миша Айканов ден Артур Ижболдин чылаштымат ӧрыктарышт: нунын «Йолташем» мурыштым совым рӱж кырен вашлийыч.

Тыгай усталык кас Нефтекамскыште концертлан верч веле огыл эртаралтеш. Тудо мемнам муро да куштымаш гоч уша, икояныш савыра, келшымашым тапта. Тидымак ончыкта концерт деч вара фойеште шагат наре шуйнышо лоҥын куштымаш…

Моло фотом тыште ончыза.
Р.Никоновын фотожо-влак.
(остальные фото можно посмотреть по ссылке)

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».