У программа дене куандарат

Российын сулло артистше, профессор С.М. Асмаевын вуйлатыме коллектив сылне музык, чапле куштымаш-влак да мотор вургем, самырык шӱлышыжӧ дене кумылым нӧлта. Тенийсе программыже - концерт-ревю - Российысе гына огыл, тӱнямбал калык-влакын келшымаш да куштымаш пайремышт. Тушто шочмо калыкнан куштымаш ден мурыжат, казак, чуваш-влакын шкешотан куштымашыштат, аргентин дробят, американ кантри-степ да молат улыт.

«Марий Эл» ансамбльын выступленийжым калык керек-кунамат уло чон дене куанен онча. Тидын нерген Йошкар-Олаште, Козьмодемьянскыште, Моркышто аншлаг дене лийше концерт-влак шижтарат.

Я. Эшпай лӱмеш Марий кугыжаныш филармоний ешартыш концерт-влакым эртарен гынат, у постановкым ончаш кумылан-влак эше ятыр улыт. Каласыман, декабрь марте палемдыме концертлаш билетым ужален пытарыме. Ноябрь мучаште ансамбль Башкортостаныш, Татарстаныш, Свердловск областьыш гастроль дене тарвана, тусо ончышо-влакланат у постановкым шке шинча дене ужаш да аклаш йӧным ышта.