«Кован шондыкшо» гыч

Кугезе кована-влакын йӧратыме кидпашашт тачысе кече марте аралалт кодын. Тидыже пеш сай. А нунын дене палымым ышташ, ожсо йолчием, вургем гоч марий калыкын уста да пашаче улмыжым пален налаш путырак сай. Тӱҥ уна, поро Катя ковай, тидын нерген ятыр каласкалыш, оҥай марий йомакым ойлыш, йоча-влакым модыктыш. 5-ше классыште тунемше ӱдыр-влакын марий сем почеш кушталтымышт мероприятийлан пайрем шӱлышым ешарыш. Шондыкысо тӱрлымӧ вургем кызытат южо суртышто кучылталтеш: шовыч, мындерӱмбал, тувыр да ончылсакыш. Тугеже, мастар марий калыкын пашаже огеш йом, а, мемнан жаплан келыштаралтын, вияҥын, уэм толеш - тыгай иктешлымашым ыштышт тунемше-шамыч. Пайрем мучаште «Шочмо калыкнан поянлыкше шондыкышто огыл, а чонышто» манмым чылан умылышт.