Ӱдырамаш тӱням сӧрастара

Тушко тӱрлӧ вере пашам ыштыше, тӱрлӧ ийготан ӱдырамаш-влак миеныт ыле. Кум шагат кечывал гыч куд шагат кас марте нунылан тӱрлӧ мастер-класс, тренинг, фотозона, выставка-влак пашам ыштышт. Ӱдырамаш-влак, врач деке пурен, тазалыкым шымлен, рӱдола гыч толшо психотерапевт-влак деч каҥашым налын, йыргешке ӱстел йыр еш илыш, икшывым ончен куштымо нерген мутланымашке ушнен, залыште бальный, восточный, индий куштымашым тунемын, мураш, пеледыш гыч сӧрал композицийым пидаш, кулинар усталыкым вияҥдаш да тӱрлӧ кидпашалан тунем кертыныт.

Ӱдырамаш-влаклан шкем шуараш, тематика дене ойыркален, латкуд площадкым келыштарыме ыле. Тиде тазалык, мода ден стиль, таза илыш-йӱла, усталык шӱлыш да молат. Кажныштыже специалист-влак ӱдырамаш-влаклан шке усталыкым чыла могырым почын пуаш сай йӧным ыштеныт. Самырык да ийготым погышо ӱдырамаш-влак косметологын креслыштыже шӱргылан тӱрлӧ процедурым ыштылыныт, массаж кабинетыште, спа-салонышто каналтеныт, стилист-визажист, парикмахерын кид йымалныже шкем сӧрастареныт. Икшыве-влакланат тӱткышым ойырымо - нунылан «Мама+малыш» пӧлкам йӧнештарыме ыле. Нуно модмо пӧлемыште аниматор-влак дене пырля сӱретленыт, интерактивный площадкылаште чонлан келшыше занятийыште жапым пайдалын эртареныт.

Форум годым тыгак «Деловая гостиная» площадка пашам ыштыш. Тушто Россий Федераций Советын Наука, образований да тӱвыра шотышто комитет вуйлатышын икымше алмаштышыже Лилия Гумерова, БР тӱвыра министр Амина Шафикова, БР Кугыжаныш Собраний-Курултай вуйлатышын алмаштышыже Эльвира Аиткулова, Башкортостан Республикын Икшывын праважым аралыме шотышто уполномоченный Милана Скоробогатова оласе ӱдырамаш-влак дене «чонан микрофон» йӧн дене мутланышт. Ӱдырамаш пайремын кокымшо ужашышкыже толшо «Территория женского счастья» проектын авторжо да тӱҥ организаторжо Каринэ Хабирова вашлиймашын кӱлешлыкшым палемдыш. Пайремыште «Башкортостан Республикысе Фитнес-аэробикын спорт федерацийже», «МамКлуб Нефтекамск», «Школа матерей», «Маленькое Чудо», «Вера, надежда, любовь» мер ушем, самырык ешын клубшо, «Продвинутын родители» клуб да моло мер ушем-влак шкешт дене палдарышт. Тудо кечын форумыш чумыржо 4000 наре ӱдырамаш миен. Ӱдырамаш-влакын виш академий семын ямдылыме пайремым лӱмлӧ уна - Российын палыме телевӱдышыжӧ, РФ Кугыжаныш Думын депутатше Оксана Пушкинан - шагатат пеле шуйнышо «Женский взгляд. Вызовы времени» лекций-мутланымашыже иктешлыш.

Тыгай форумым Стерлитамак ден Нефтекамскыште веле огыл, Башкортостанын моло олалаштыжат эртараш палемдыме.