Тек мурыжо оҥгыр йӱкла йоҥга

Валентина Тимирхановна Калтаса районысо Тошто Яш ялеш шочын-кушкын. Тӱвыра аланыште школым тунем лекмыж годсек шкенжым шуара. Йошкар-Оласе культпросветучилищыште тунем лекмеке, шочмо-кушмо верышкыже пӧртылын. 1985 ий гыч тӱҥалын, тачысе кече марте районысо тӱвыра пӧлкаште методистлан ышта, тыгак «Ший оҥгыр» ансамбльым вуйлата.

«Ший оҥгыр» ансамбль 1999 ийыште Калтаса селасе тӱвыра пӧртыштӧ шочын. Ансамбльыш туныктышо, йочасадыште да тӱвыра аланыште ыштыше, марий мурым йӧратыше, марий шӱлышан ӱдырамаш-влак коштыт.

Валентина Тимирхановна - поро да шокшо чонан пелаш, ава. Яндар йӱкшӧ тӱвыра полатын сценыж гыч йоҥга. Тудо мурым воза, мемнам мураш туныкта. «Марий улам - марла мурем!» илыш девизше тудлан моткоч келшен толеш. Валентина Тимирхановна мураш гына тале огыл, социальный йодыш-влакым решатлаш полша. Тудо 2016 ийыште неле черан еҥ-влаклан полшымо шотышто благотворительный фондым почын. Тиде моткоч суапле паша.

Южгунам илыш нерген шонкалет да чучеш, пуйто пӱрымаш ала-кузе чыла шке тыге савыркала. Поро чонан еҥ-влак дене палымым ышта, илышым сай могырыш виктарыше событий-влакым пӧлекла. Иктаж осал але нелылык вашлиялтыт гын, пеҥгыдемда. Жап эртымеке, чылажат сайлан лиймым умылена. Валентина Тимирхановна усталык пашам аклен мошта, марий калыкын тӱвыражым вияҥда. Ме тудлан эре тыгаяк поро, весела лияш тыланена. Шонымашыже шукталтше, ӱмыржӧ кужу, илышыже ӱй да мӱй лийже!