«Акарт» ансамбль Москвасе пайремыш миен.

Моско марий-влак деке тений Марий Эл Республикын Звенигово районжо гыч «Шӱм куан» да Пошкырт кундемысе Мишкан район Ардаш ялын «Акарт» фольклор ансамбльже-влак унала толыныт ыле. Нуно поян да оҥай программышт дене рӱдоласе пайремым пешак сӧрастареныт да илыме вер-шӧрын фольклоржо дене талын палдареныт.

«Моско пайремыш мияш шукертак шонымаш ыле, - ойла «Акарт» ансамбльын вуйлатышыже Владимир Хамитов. - Башкортостан Республикым, моло лишыл кундемым концерт дене шуко гана коштын савырныме, а Москош мияш йӧн лектын огыл. Садлан, кунам мыланна Моско марий землячество деч ӱжмаш тольо, вигак ик ой дене мияш кутырен келшышна!»

Погынышо калыкым тиде тале коллектив ятыр у муро дене палдарыш, тальянке, тӱмыр, пу совла денат шокталтышт. Ансамбль усталыкше дене верысе калыкым йӧршын ӧрыктарыш - ончышо-влак куаныштым нимынярат ышт шылте.

Мишкан села тӱнямбал конкурсышто сеҥышыш лекме да шушаш ийыште уло финн-угор тӱнян тӱвыра рӱдерже лийме нерген ансамбль Москошто гына пален. Йӧн дене пайдаланен, Владимир Хамитов пайремыште сцене гыч моско марий-влакым Мишканыш унала мияш ӱжӧ. Мияш кумылан-влакат ятыр лектыч. Мотор Мишкан велыш мияш кунам эше тыгай чапле амал лектеш?!

Пеледыш пайрем деч вара вес кечыжлан земляк-влак куанымышт дене ансамбльлан Москошто кугу экскурсийым эртареныт. Нуно Йошкар площадьыш, «Зарядье» паркыш миеныт, ВДНХ мучко коштын савырненыт. Тыгай чолга ансамбльлан вес ийлан Санкт-Петербургыш «Пеледыш пайремыш» мияш темлымаш йоҥгыш. Эрвел марий фольклорым «Акарт» ансамбль Российын йӱдвел рӱдолаштыжат тыгак куатлын ончыкта манын ӱшанена.