Ужар пӱртӱс лоҥгаште

Виш фестиваль-конкурсыш кеч-могай коллектив ушнен кертеш, садлан моло район ден олала гыч мийыше-влакымат уло кумылын вучат. А Гран-прим сеҥен налшыже Пӱнчерыш эше ик гана корным кучышаш - вес ийжылан тудлан фестивальым почаш ӱшанат. Тыге тений Краснокам районысо Коян села гыч «Талисман» образцовый хореографический коллектив (вуйлатышыже Ю. Исамбаева) пайрем флагым нӧлтале да эн ончыч кушталтыш.

Шке мастарлыкыштым ончыкташ да вес коллектив-влакын шумо кӱкшытыштым аклаш, нунын дечат молан-гынат тунем каяш лу утла коллектив миен ыле. Самырык-влакын сценыште куштылгын тавалтымыштым ончаш пешат кумылло чучо.

Мишкан район Пӱнчер, Кугу Соказа, Тымбай, Йылыш, Монар, Нуриман район Тошто Педий да эше икмыняр ялын коллективышт кажныже мо дене гынат ойыртемалтыч да сай шарнымашым кодышт.

Ты фестиваль-конкурсын вес ойыртемалтше палыже нергенат каласен кодынем. Тудым кажне гана профессиональный жюри акла. Тений суапле сомылым Россий Федерацийысе тӱвыран, Башкортостан Республикысе тӱвыран сулло пашаеҥышт Я. Янгубаев, Башкортостан Республикын сулло артистше А. Байгазов, Башкортостан Республикысе тӱвыран сулло пашаеҥже В. Сагадеев шуктышт. Каласаш кӱлеш, нуно кумытынат Мишкан районын шочшыжо улыт, жапыштыже шкештат тале куштызо лийыныт, чапланыше коллектив-влакым вуйлатеныт. Садлан, очыни, объективный аклымаш деч вара нимогай йодыш огеш лек.

Тений жюрин каҥашымыж деч вара шуко да шагал чотан коллектив-влакым посна палемдышт. А Гран-прим Нефтекамск оласе «Дружба» калык куштымаш ансамбльлан (вуйлатышыже Н. Садретдинов) кучыктышт.

«Кушталташ йодеш чонемже» фестиваль унаже да ончышыжо-влак дене вес ий марте чеверласыш. Тудын «кресачаже», Пӱнчерысе тӱвыра пӧрт пашаеҥ А.А. Иванов районысо коллегыже да верысе школ коллектив полшымо дене черетан куштымаш пайремым ямлын эртарен колтыш, уна-влакым поро кумыл дене вашлийын, сийлен ужатышт.