Пӱрымашым шке чоҥат

«Тыгай сеҥымашыш шумемлан эреак пеленем улшо йолташем, предприятийысе пашаеҥем-влаклан таум ойлем, - чон почын каласыш Надежда Мурзагареевна. - Документым ямдылыме, моло годымат профессионал кӱкшытым да мастарлыкым ончыктышт. Якутий, Чечня, Кабардино-Балкарий да моло верла гыч мийыше-влаклан чумыр республикышт дене ямдылалташ полшеныт гын, ме шкенан еҥна-влакын вийышт денак могай улмынам ончыктен да эше сеҥен кертна. Марий-влакын вийышт - шкенан кидыштына. Тау Кугу Юмылан тыгай чолга пашаеҥ да йолташ-влак дене ушен, пашам ышташ полшен шогымыжлан!»

Мер пашаеҥ-влак сомылыштым кузе шуктымо нерген каласкалышт, кажне ялсовет кундемыште марий шӱлышым шарен толмо поро паша опытым калык коклаште кузе шараш кӱлмӧ шотышто икте-весыштын ойлымыштым колыштыч, лончылышт. Мутлан, Акпарс ялсоветысе марий калык пытартыш жапыште молан помыжалтме гай лийме нерген Г.Е. Ахметшинам каласкалаш йодыч. Тудо тыге мане: «Ял калыкын мӧҥгыштӧ телевизорым ончен шинчен шерже темын. Ноеныт тыге илен. Клуб огеш почылт, тудым ачалаш шийвундо уке, маныт. Ну мо вара? Кунам почылтмыжым вучен илаш? Ме тӱшкан тарванышна да уремыштак, сайрак верым келыштарен, мероприятий-влакым эртараш тӱҥална. Н.М. Давлетова, моло чолга еҥ-влак мемнан деке ушнаш кеч-кунамат ямде улыт. Калыкланат келшаш тӱҥале, пӧртыштӧ шинчен огыт чыте, «Эше кунам, могай пайремым тарватеда?» манын йодыштыт. Оксат, клуб пашаеҥат ок кӱл. Чыла шкенан деч шога. А калыклан келша гын, тудо ушна. Ончыч изишак ӧрмалгеныт гын, ынде ӧрдыжеш кодшо уке».

Умбакыже кеҥежым эртарышаш тӱвыра пайремлан ямдылалтме йодышлам каҥашымашке куснышт, паша радамым пеҥгыдемдышт. Тений Куштымаш пайремым иктаж ялыште огыл, а райрӱдыштӧ эртараш кутырен келшеныт, «Кандырам» Шаран покшелне «рашкалташ» шонат.