Йылме ила - калык ила

Кажне калыкын шке сынан йӱлаже, тӱвыраже, йылмыже уло. Нефтекамск олаште руш, башкир, татар, марий, удмурт йылме дене веле огыл, чуваш, немыч, украин, мордва йылме денат мутланымым колаш лиеш. Кажне йылме шке семынже ойыртемалтше, мотор. Шочмо йылмын сылнылыкше, кӱлешлыкше нерген мутланаш Нефтекамск олаште кокымшо ий почела «Келшен илыше ешыште» пайремым эртарат. Тений шочмо йылмылан пӧлеклалтше вашлиймаш 20 февраль вӱргечын оласе историй да краеведений музейыште лие. Пайремыш оласе национально-культурный ушем-влакын рӱдерыштым вуйлатыше, студент-влак чумыргеныт ыле.