Пӱрӧ велне «пургыжта»

«Пӱрӧ пургыж - 2019» фестиваль-конкурсыш Памаш тӱвыра пӧртын коллектившат (вуйлатышыже М.Р. Янышева, хормейстер Л.И. Сайсанова) ушныш. «Ший памаш» ӱдырамаш калык ансамбль, «Йоҥгалтыш» дуэт да тӱвыралан шӱман моло еҥ-влак уло кумылын пашалан пижыч да шагал огыл пӱжвӱдым йоктарышт.

Чатлама тылзе мучаште Памаш тӱвыра пӧртыштӧ конкурсын икымше этапше эртыш. Ончаш погынышо-влак коклаште шоҥгыжат, самырыкшат ятырын ыльыч. Тений коллективын пашаштыже уым кычалмаш, чот тыршымаш, марий йӱла да традицийлан эҥертымаш, патриотизм шӱлыш шижалтыч. Башкортостан Республикын 100 ияш лӱмгечыжым сайын вашлияш шонымашымат пуртымо ыле.

Репертуаржат поян да оҥай: кызытсе да ожнысо муро, куштымаш, почеламутым сылнын лудмаш, дуэт, соло, мыскара да молат. А Морко районысо (Марий Эл) марий-влакын куштымашыштым ончаш путырак оҥай ыле - самырык ӱдыр-влак пешак кертыт!

Туныктымо паша тургым кокла гычак Памаш кыдалаш школын «Эрвий» мурышо да куштышо ансамбльжат ӧрдыжеш ыш код. Нунат чапле номерым ямдыленыт, ончышо-влаклан пеш келшыш, вет туныктышо-влак эре калык коклаште лийшаш улыт. Ончыкыжат тыге лиеш манын ӱшанен кодына.

Вӱдышӧ-влак Кирилл Исанбаев да Яна Алексеева программым мастарын намийышт. Самодеятельный артист-влак шке шонымашышкышт шуыч, ончыланышт шындыме задачым шуктышт.

Концертыште марий шӱлыш озаланыш. Тыгай мероприятий-влак шоҥго ден самырык тукым кокласе кылым пеҥгыдемдат, марий калык йӱлам да традицийым пагалаш да аралаш ӱжыт, марий улмына дене кугешнаш таратат.

Жюри член-влакын мутышт тыгай лие: «Памаш ялын артистше-влак Пӱрӧ районын жемчужиныже улыт!» Ончылно нуным кокымшо тур - гала- концерт - вуча.