Йоча-влак Шорыкйолым пайремлышт

20 январьыште Уфа оласе Рушарня марий школышто «Шорыкйол» пайремым эртарышна. Эн ондак Шорыкйол нерген видеоматериалым ончышна, «Ош Виче сем» ансамбльын солисткыже-влак «Уна муро» мурым йоҥгалтарышт. Залым марий сурт гай сӧрастарыме ыле. Суртоза, Орина кока, вучыдымын уна-влакым вашлие. Эн кугу уна-влак Рушарня марий школын тунемшыже-влак ыльыч. Орина кока нуным тамле сий дене вашлие - мелнажат, когыльыжат, кыстывийжат, пӱкшыжат ыле. Васли Кува ден Васли Кугызат йоча-влак деч вараш ышт код - нунат пайремыш толыныт ыле. Орина кока нунылан идалык мучко мом ыштымыжым каласкалыш, кидпаша мастарлыкшым ончыктыш. Йоча-влак, кож йыр пӧрдын, «Изи кож» мурым йоҥгалтарышт, туныктышо-влак «Каза ден Маска» сценкым ончыктышт, сценарий почеш тӱрлӧ модыш дене модыч («Вуверкува выньык», «Сокыртага», «Мешак дене куржталмаш» да молат). Нунылан «Мый кӧ лиям?» модыш поснак келшыш. Тунемше-влак изирак чондай гыч тӱрлӧ арверым луктедышт, мутлан, кубик - тиде чоҥышо, таблетке - аптеке пашаеҥ, расческо -парикмахер, совла - повар да молат.

Васли Кугыза ден Васли Кува тунемше-влакым сайын тунемаш, тыгаяк таза да весела лияш кумылаҥдышт, а Орина кокалан тазалыкым, пиалым, суртшылан шуко вольыкым тыланышт. Пайремым «Кандырам пунен куштымаш» дене мучашлышна.