Васли Кува - вучымо уна

Ковам ойла ыле: «Тиде пайремлан ожно пеш чот ямдылалтыныт. Ӱдырамаш-влак меж носким, пижергым, вынер тувырым, пӧръеҥ-шамыч йыдалым ямдыленыт. Мыняр шуко ямдылыме, ешын тунар пашаче, уста улмыжо койын». Васли Кугызам кажне суртышто тамле кочкышым ямдылен вученыт. Тудын могай сугыньым каласымыже унам вашлийын моштымо деч шоген. Сай вашлийме огыл гын, осал шомакымат колаш верештын.

Кызыт Шорыкйолым ончычсо семын пайремлымым шагал ужына. Васли Кува ден Кугыза-влакат шуэнрак коштыт, нуным чыла еҥ суртышкыжо огешат пурто.

Шорыкйол тӱҥалмеке, Йывангасола тӱвыра пӧрт, библиотека пашаеҥ-влак да ялысе икмыняр ӱдырамаш, Васли Кува лийын, пайремыш тарванышна. Эн ондак Шакирова Валя кока деке ошкылна. Пурымеке, шушаш ийыште киндылан, вольыклан поян лийза манын, кӱварыш шыдаҥым шуышна. Озавате пайрем лӱмеш тамле мелнам кӱэштын ыле, уна-влакым шунен-шунен сийлыш. Чеверласыме годым тудо уна-влаклан, у ийыштат илыш тыгаяк тамле лийже манын, кампетым шалатыш. Васли Кува-влак, озаватым мокталтен, поро тыланымашым каласен, вес пӧртыш - Галина Ивановна Уварова деке - ошкыльыч. Озавате уна-влакым мотор марий тувырым чиен вашлие. Васли Кува-влаклан ик ий мучко ямдылыме пашажым ончыктыш - тудо меж носким, пижергым, паласым пидын, межым шӱдырен, шуко мундырам ыштен. Уна-влакым сийлаш тамле деч тамле кочкышым ямдылен. Сийжым тамлен, Шорыкйол мурым муралтен, шушаш ийыште тазалыкым, кужу ӱмырым, чыла сайым тыланен чеверласышна.

…Улыт улмаш яллаште кызытат тиде пайремын йӱлажым палыше, шуктышо еҥ-влак. Нунылан кугу таум каласыме шуэш.