Илышын моторлыкшо шкенан кидыште

Тушко Бирск район Памаш ялысе СДК-н пашаеҥже-влакат ушненыт да кум икымше степенян дипломым сеҥен налыныт. «Мурымо да сем усталык» номинацийыште школышто тунемше ӱдыр-влакын «Йоҥгалтыш» дуэтышт (Полина Сайсанова, Дарья Янышева, вуйлатышышт - Памаш тӱвыра пӧртын художественный руководительже Людмила Сайсанова) сеҥышыш лектын. «Калыкемын вургемже» конкурслан пашам куратор семын СДК-м вуйлатыше Марина Янышева ямдылен, тиде номинацийыште Дарья Янышева сеҥен. «Элын историйыштыже - ешемын верже» номинацийыш колтымо паша дене Полина Сайсановам икымше степенян диплом дене палемдыме. Кугу элыште изи калыкнан вержым, шӱм-чон моторлыкшым, тӱвыра поянлыкшым тыгай конкурс гоч ончыктен моштымыштлан да эше сеҥышыш лекмыштлан Памаш клубын, школын творческий коллективыштлан, вуйлатышыштлан ончыкыжымат йылдыр йоген лекше вӱд гай корным почын шогаш юзо вийым да усталыкым тыланена.