Иктыш ушышо пайрем

Марийын ожнысек йӧратыме кугарня кастенже, 7 декабрьыште, Нефтекамск олаште марий пайрем - усталык кас - гӱжлен эртыш да, тысе икымше марий творческий ушемын шочмыж семынак, ынде историеш кодо.

Кумло ий… Жап шижде эрта. Тунам, кумло ий ончыч, «Строитель» тӱвыра полатыште марий-влакын усталык рӱдерыштышт мурышо коллектив, самодеятельный театр, литератур пӧлка да кидмастар-влакын кружокышт пашам ышташ тӱҥалыныт. Варажым - «Чолман» фольклор ансамбль, тудын 1990 ийыште Нефтекамск олаште «Содружество» тӱнямбал фестивальыште призым сеҥен налмыже, 1991 ийыште Йошкар-Олаште Финн-угор калык-влакын тӱнямбал фестивальыштышт Нефтекамск олан чапшым аралымыже, «Чолман» газетын шочмыжо… Тугодсек шуко вашталтыш лийын, «Чолман» творческий ушем гочат ятыр еҥ эртен, вийжым терген ончен. Усталык ушемлан, фольклор ансамбльлан «Чолман» лӱмым пуышо, а варажым тыгаяк лӱман марий газетым олаштына шочыктышо еҥ таче мартеат марий культурым да йылмым арален кодымо верч лым лийде тырша, калыкнам ушен шогашлан мер пашалан вийжым чаманыде пуа, шарнымаш пайремымат тудак тарватен. Тиде - «Чолман» газетын тӱҥ редакторжо, Башкортостан Республикысе культурын заслуженный пашаеҥже И. Губаев.

Кум шагат шуйнышо пайрем ик шӱлыш дене эртен кайымыла чучо, а нылымше шагатше - зрительын койыш-шоктышыж ден усталыкшым ончыктымо жап - фойеште пеш шокшын озаланыш, молан манаш гын тыште пайремым мучашлыше «Кандырам» элнен пытымеш кушташ лийын. Нигӧ ноен огыл. Мӧҥгыш каналтыше, куаныше, нӧлталтше кумыл дене веселан ошкылыныт.