Кузе канен моштена, туге пашам ыштена

Шыжышке пурымекак, «Саде концертда кунам лиеш?» манын йодышташ тӱҥалше-влакын кумылыштым шуктена: эн сай мурызо, фольклор да куштышо-мурышо коллектив-влакым чон лушкымеш ончен-колышт шинчаш да шканетат модын, муралтен-тавалтен керташ лийме марий пайремна Нефтекамскыште тений 7 декабрьыште лиеш. Тидын дене ме оласе Марий тӱвыра тылзым иктешлена да ош телым почына, У ийым лишемдена. Билетым налаш гына вараш ида код.

Эх, вер ок сите вет! Оласе тӱвыра полатыште кокымшо ярус уке. Можыч, мемнан пайремнам шотыш налын, кунам-гынат ала ыштат ыле? Но кызытеш фойем пуымыштат сита, тудым ме выставкыланат, мураш-кушташат кучылтына.

Артистна-влак шукын толыт, садлан ты гана концертымат фойе гычак тӱҥалына. А могай коллективлан ушнаш тений вер ситен огыл, ида ойгыро, вес ийлан йодмашым ончычрак колтыза. Марий Эл, Татарстан Республикыла, Свердловск область, эсогыл Чукотка гыч толшо унана да шкенан республикысе марий артистна-влак Регион-влак кокласе V фестивальнан сескемжым ылыжтат. Кӧ, кушеч толеш? Тиде йодышлан вашмутым концертыште муыда. Унана-влак коклаште кажне гана вашталтыш лийын шога, у коллектив-влак ешаралт толмо дене фестивальна кушкеш, уэмеш. Вич ий ончыч ик рвезын мурымыжым колыштын, залыште ӱдырамаш-влак шинчавӱдым ӱштын шинчышт. Тиде «Пограничник муро» тӱнямбал конкурсын лауреатше Борислав Ашиев ыле. Йодмыдам шуктена: тений тудо адак мемнан унана лиеш. Ты гана мурыжо-влакым чыла марла йоҥгалтара. Мураш-кушташ вийым поген толза. Пайремыште вашлиймешке!