Чолман воктен, вӱд воктен

Пайрем Янаулышто почылтын. Вес кечынже Эльяныште (Николо-Березовка) лийше семинарыште верысе финн-угор калыкын йӱлаже (тӱҥ шотышто тыште илыше марий-влакын) нерген ойленыт, марий вургемым, кидпаша мастарлыкым ончыктеныт да «Мотор марий ӱдыр» конкурсым эртареныт. Краснокам, Калтаса, Дӧртыльӧ, Бирск, Татышле, Янаул районла гыч 9 ӱдырын койыш-шоктышыжым да моштымыжым акленыт. Мишканыште фольклор коллектив-влакын мастарлыкыштым тергеныт. Туштыжо Мишкан, Бирск, Краснокам, Илиш, Благовещенск, Балтач, Калтаса районла гыч марий фольклор ансамбль-влак да Татышле район гыч ик удмурт коллектив пайремыш ушненыт. Фестиваль гала-концерт дене Татышлыште мучашлалтын.

Тиде пайремын организаторжо семын республикысе Тӱвыра министерствым, Калык усталык рӱдерым, Калык-влак келшымаш пӧртым да ныл районысо администраций-влакым ончыктымо. Но кызытсе илыш условийыште ялласе клуб пашаеҥ да йырышт чумырген шогышо коллектив-влакын тыршымышт деч посна тыгай мотор пайремым эртараш ок лий, шонем. Эльяныште да Мишканыште лийын (Ик вереже жюриште пашам ышташ логале.), тидым шкеак ужым да умылышым. Икмыняр шонымашат шочо

Мутлан, самодеятельный фольклор коллектив-влакын мастарлыкыштым тергымаште эн тӱткӧ да объективный жюри - тиде ончышо, калык шкеже. Организатор, жюришке калык йӱлам, мурымаш-куштымаш конкурсым аклаш фольклор поянлыкым пеш сайын палыше еҥым муын огеш керт гын, тидым зрительлан ӱшанаш кӱлеш докан. Весе. Эн сай марий ӱдырым ойырен налме таҥасымашым эртараш гын, тудо чын марий шӱлышан лийшаш, конкурсын условийыштыжат рашемдыман: шке нерген презентацийым, мастарлыкым почын пуымо номерым рушла ончыктыман да ойлыман огыл. Тидын шотышто вес калык деч примерым налман. Адакшым аклыме годым «шкенан» але «вес районын» манме шонымаш лийшаш огыл, сеҥышаш эн мотор, эн мастар, эн чолга… Икманаш, конкурсын йодмашыже чылалан икгай лийшаш, а тыршыше еҥын пашаже арамыш лекшаш огыл. Марий самодеятельный коллектив-влак шукын улыт. Краснокам районышто гына, уна-влаклан ямдылыме брошюрышто возымылан ӱшанаш гын, 105 марий коллектив шотлалтеш. Южгунам тӱвыра мероприятийыште але концертыште самодеятельный артист-влак ончаш мийыше дечат шукырак койыт.

Фестиваль моторлыкым, йомартле койышым почын ончыкташ полша. Но тыгодымак ситыдымашым тӱжвак луктеш. Пайрем эртен кайымек, тудын лектышыжым иктешлаш да сайжылан куаныме дене пырля могай проблемым кораҥдаш кӱлмӧ шотышто умбакыже мондыман огыл ыле. Но кӧ тидым лончылаш тӱҥалеш? Тиде риторический йодыш семынак кодеш дыр…

Туге гынат тиде фестивальлан мотор вургемым, кидпаша мастарлыкым да марий койыш-шоктышан, сай номер-влакым ямдылыше районласе клуб пашаеҥ-влаклан вуйым савыме шуэш.

Эльян - Мишкан