А паркыште музык йоҥген…

«Уфанет» компаний да «ЯН» продюсер рӱдер, верласе администраций-влаклан эҥертен, «Классик музык марафоным» визымше ий почела эртарат. Тений тудо Башкортостанысе, Татарстанысе, Оренбург областьысе 14 олам авалтен. Музыкант-влак, 3 июльышто Мелеуз гыч тӱҥалын, Ишимбай, Салават, Стерлитамак, Нефтекамск, Янаул, Бирск олала гоч пытартыш концерт марте кандаш тӱжем наре километрым эртат. Марафоныш шым духовой оркестр ушнен, а тиде - 200 наре мастар музыкант.

Нефтекамскыште Оренбург областьысе Орск олан муниципальный духовой оркестрже (художественный вуйлатышыже да дирижержо Олег Комарин) да 12-шо отдельный гвардейский Кенигсбергско-Городокский Краснознаменный инженерный бригадын военный оркестрже (вуйлатышыже - военный дирижер гвардий капитан Азат Юлтимеров) шоктышт. Нуно мемнан да йот элласе композитор-влакын произведенийыштым, палыме кинофильмла гыч сем-влакым йоҥгалтарышт.

Ты кастене паркыш шуко еҥ погынен ыле. Нунылан жапым пайдалын эртараш моло йӧнымат темленыт: опытан да самырык музыкант-влак шоктеныт, верысе поэт-влак почеламутыштым лудыныт, кумылан-влаклан куштымаш флешмобым ямдыленыт, кидмастар-влак тӱрлӧ арверым ужаленыт…