«Кугезе мландыш» миеныт

Пайремыш Башкортостан, Чуваший республикыла, Нижегородский, Самарский, Киров областьла, Ямало-Ненецкий автономный округ да Марий Элысе тӱрлӧ районла гыч 49 коллектив чумырген. Уна-влаклан оҥай программым ямдыленыт: этнографий выставкым почыныт, коллектив-влак шке мастарлыкышт дене палдареныт, марий сувенирым ышташ, тӱрлаш, кушташ да моло ӱнарлан туныктеныт, кидпаша арверым ужалаш, «йыргешке ӱстел» йыр мутланыме годым Юл да Вӱтла кундемыште илыше марий-влак нерген утларак пален налаш йӧн лийын.

Благовещенск ола гыч Владислав Аптыкаевын вуйлатыме «Оҥгырйӱк» фольклор ансамблят курыкмарий-влак илыме Килемар район гыч тич шарнымаш да диплом дене пӧртылын. «Оҥгырйӱк» - але самырык ансамбль гынат, тӱрлӧ верлаш миен кошташ да эрвелмарий-влакын койыш-шоктышышт дене палдараш йӧным муынак шога. А вес арнян Благовещенск оласе тӱвыра полат ончылно идалыкаш лӱмгечыжым палемдаш ямдылалтеш.

Э. АПТУЛМАНОВА.

Снимкыште: «Оҥгырйӱк» ансамбль.