Фестиваль мастарлыкым шуараш полша

Теният фестивальыш Мишкан районысо Корак, Монар, Тымбай, Ардаш да моло ялласе тӱвыра пӧрт-влакын веле огыл, Бирск район Изи Соказан, Калтаса селан, Шоръял, Агытан ял-влакын, Краснокам район Коян селан коллективышт, Нуриман район гыч Асеевмытын еш ансамбльышт толыныт ыле. Ятыр куштызым да шуко ончышым чумырен кертме вес амалжылан, можыч, чоным лыпландарыше да кандарыше, сӱретысе гай мотор пӱртӱс помышышто эртараш йӧным мумым шотлыман. Но тений чылажат шонымо семын миен ыш лек. Унам вашлияш ямдылалт шуктымо да артист-шамычын мотор марий вургемым чиен шогалмышт деч вара мландӱмбалне йӱр пырче-влак чӱчкаш тӱҥальыч, сценысе кӱварым тазылаҥден, кушталташ лӱдыкшым ыштен шындышт. Организатор-влакын каҥашен налме деч вара погынышо калыклан Соказа клубыш куснен каяш вереште. Но тиде пайрем кумылым пырчат ыш лапкаҥде.

Фестивальым кок йыжыҥ дене эртарышт. Кажне коллектив кок номер деч шагал огыл конден ыле. Можо поснак куандарыш: мурышо коллективлаште чӱчкыдынракше кугурак ийготан ӱдырамаш-влакым ужын тунемалтын гын, куштышо-влак коклаште самырык, нӧргӧ ӱдыр-рвезат ятыр. Мотор чурийвылышыштым, лывырге кап-кылыштым, куштылгын тарванылмыштым, пеледыш гай тӱрлӧ сынан сӧрал вургемыштым ончен куанет.

Жюрилан чыла шотыштат объективно аклаш куштылгыжак огыл ыле докан. Но тушто кок тале куштызо, республикыште кумдан чапланыше марий ансамбль-влакын ончычсо вуйлатышышт - Россий Федерацийысе культурын, Башкортостан Республикысе культурын сулло пашаеҥышт Я. Янгубаев да Башкортостан Республикысе культурын сулло пашаеҥже В. Сагадеев ыльыч.

Ӧрдыж гыч ончымаште коллектив-влакын мастарлыкышт, постановкышт тӱрлӧ кӱкшытанрак улмыла чучо. Тидыжым умылашат лиеш: иктышт ятыр ий куштат, южышт шукерте огыл веле «ик ешыш» ушненыт. Но жюри да организатор-влак нигӧм ышт ӧпкелтаре - чыла коллективым могай-гынат номинацийыште палемдышт, кажнылан дипломым да пӧлекым кучыктышт. А Гран-прим тений Краснокам районысо Коян села гыч «Талисман» образцовый хореографический коллектив (вуйлатышыже Ю. Исамбаева) сулыш.

«Талисман» Пӱнчерысе икымше куштымаш фестивальышкат толын ыле. Тунам чонеш пеш келге кышамак ыш кодо. Кӱчык жапыште профессионал мастарлыкшым тыгай кӱкшытыш нӧлтал кертмылан куанен мокталташ гына кодеш. Олыкмарий да курыкмарий куштымашыштым ончышо-влак шокшын вашлийыч. Чынак, тыгай фестиваль-влак, икте-весым ужын, ваш-ваш тунемын, мастарлыкым шуараш полшат.

Мишкан район администрацийлан, тӱвыра пӧлкалан, полышкалышыже-влаклан эҥертен, Пӱнчер тӱвыра пӧрт пашаеҥ А.А. Ивановын тарватыме фестиваль калыклан вучымо пайрем гай лие: палыме, лишыл еҥышт дене шыман кутыралтен, фоеште шер теммеш «кандырам» пунышт, амалкалче-влакын ямдылым шашлыкым, сийым тамлышт. Оза-влакат тора гыч толшо уна-влакым марий йӱла почеш ӱстел коклаште сийлен ужатышт…

Э. АПТУЛМАНОВА.

Снимкыште: «Талисман» ансамбль кушта.

Р. Никоновын фотожо.