Кажне ийын - у уна-влак

Ардаш ялысе тӱвыра пӧртыштӧ калык семӱзгар дене шоктышо мастар-влаклан «Шокталте, шокталте…» пайремым тений кудымшо ий почела эртарышт. Семык кечылаште йырым-йыр кундемысе калыкын Акарт курыкышто веселитлыме жапшым шарнен илыме лӱмеш ты пайремым илышыш шыҥдарыше клуб пашаеҥ Владимир Хамитовын, тудын вуйлатыме «Акарт» калык ансамбльын да полышкалышыже-влакын тыршымышт дене тудо кажне гана у йогыным налеш, у сем-влак да койыш-шоктыш дене пойдаралтеш, тымарте уждымо коллектив-влакым уша. Теният Татарстан районысо Агрыз районын уста музиканчыже, Сарапул гыч музиканче да мурызо-влак, Благовещенск ола гыч «Оҥгыр йӱк» фольклор коллектив, Нефтекамск ола гыч «Шӱдыргорно» вокальный ансамбль да мурызо-влак А. Ипаева ден Л. Ислаева шке кундемысе сем поянлыкыштым тичак конденыт ыле. Музиканче-влак Игорь Кутлукаев (Бирск район), Герман Баймулин, Николай Янсубаев, Олег Шаймарданов, синтезатор дене шоктышо Игорь Васильев (Мишкан район), Сергей Зайнитдинов (Краснокам район) калыкым шер теммеш мурыктышт-куштыктышт.

Марий калыклан, кызытсе илышыште кумдан шарлыше флешмобым да мойн увертарен, тушко еҥ-влакым виеш поген толашышашат уке, тальянке дене ямлын шоктен колтышо лиеш гын, тавалташ лекде огыт чыте, эше туге рашкалтарен такмаклен пуат - арня дене ямдылалтыныт мо? Ардаш клубышто чевер деч чевер марий вургемым чиен толшо калыкым, кужу-кужу йогын дене «кандырам» пунышо-влакым йывыртен ончышна. Чоныштына ты тулойыпым арален коден кертына гын, вӱрым шолаш пуртышо, кап-кылым лывыртен колтышо лыкын-лукын сем, такмак ден муро-влак, чумыр ончымаште тӱвыра поянлыкнат огыт йом, шонена.

Э. АПТУЛМАНОВА.