Марий театр сеҥыше радамыш логалын

14-18 майыште Учале районышто национальный театр-влакын «Алтын тирмэ» регион-влак кокласе фестивальышт эртен. Нине кечылаште национальный драматургийын произведенийлаж почеш 20 утла постановкым шындыме.

Театр-влакын усталык кӱкшытыш-тым аклыше жюриште ятыр лӱмлӧ еҥ лийын: Российысе театр искусство институтын (ГИТИС, Москва) режиссура да актер мастарлык кафедрыштыже туныктышо, режиссер

А. Трифонова, Башкортостан Республикысе искусствын сулло пашаеҥже, Ш. Бабич лӱмеш самырык-влакын премийыштын лауреатше М. Кульбаев, Российын да Башкортостанын калык артистше, С. Юлаев лӱмеш кугыжаныш премийын лауреатше Х. Утяшев, Республикысе калык усталык рӱдерын театральный мастарлык шотышто тӱҥ специалистше Т. Калмурзина да молат.

Конкурсышто Гран-прим Белорецк оласе «Иремель» башкир калык театр сулен налын. Мишкан селасе тӱвыра пӧрт пелен пашам ыштыше, ятыр ий калыкым куандарыше «У илыш» марий калык театрым икымше вер дене палемденыт. (Марий театр республикыште икте веле.). Кокымшо верым Гафури районын «Гафури», Межгорье олан «Карлугас» да Учале районын «Уйташ» башкир калык театрже-влак налыныт. Кумшо вер дене Челябинск областьысе Аргаяш районын «Хомай» башкир, Дӧртыльӧ оласе З. Султанов лӱмеш татар, Баймак оласе «Талкас» башкир да Татарстан Республика Актаныш районысо Киров калык театр-влаклан пуымо.

Л. ШАВАЛИЕВА.