«Марий поэзийын чолга шӱдыржӧ»

Кӱшыл Ӱзек книгагудышто марий поэзий тӱням шке мастарлыкше дене сылнештарыше да чапландарыше Валентин Колумбын лӱмгечыжлан пӧлеклыме «Марий поэзийын чолга шӱдыржӧ» касым эртарышна.

Тудым шке мастарлыкышт дене Благовещенск ола гыч толшо мурызо-влак Ирина Аптыкаева, Раиса Бикмурзина, Анна Исаметова, Вера Маникаева да баяным устан шоктышо Рим Сайфуллин сӧрастарышт. Вӱдышӧ-влак Роза Данилова да Юлия Жукова презентаций йӧн дене погынышо-влаклан поэтын илышыжым да творческий корныжым, сӧрал йылме дене возымо почеламутшо, легендыже, кусарыме пашаже-влакым уэш шарналташ полшышт. Ирина Аптыкаева, Раиса Бикмурзина, Иннеса Джумаева, Роза Данилова, Юлия Жукова Валентин Колумбын сылне почеламут корнылажым марла да рушла йоҥгалтарышт. «Марий сылнымут тӱняште» литератур пӧлкаш коштшо Олеся Саликаева, Кирилл Леонтьев да пӧлка вуйлатыше Ольга Леонтьева поэтын «Пий ден пырыс» йомакшым модын ончыктышт.

Чоным кандарыше, куандарыше, пойдарыше погынымаш пайрем семын эртыш. Тушто лийше-влак, пашаш у шӱлышым пуртен тӱҥалме корнышто могай гына чаракым вашлияш ок логал гынат, чылажымат кыртмен сеҥен, ончыко ошкылаш да тыгай вашлиймаш-влакым чӱчкыдынрак эртараш, марий сылнымут мастар-влак дене калыкым палдарен шогымо пашам умбакыжат шуяш ойым ыштышт.

Р. ДАНИЛОВА.