Корзинкасе кеҥеж

Кече ӧрканен эҥешыс.

Чал айдеме кас велеш,

Корзинкаш пыштен кеҥежым,

Ола мучко ошкылеш.

Ал кеҥеж шыҥен пазарыш,

Арбуз семын чеверген.

Ок сите шийвундо - аре,

Шарналтен йолташ нерген.

Нал чыла: 

          Кеҥежын сийже

Кажнылан сита аман?

Мардежан кӱсенын шийже

Койдымын шула 

                       шыман.

Ӱмыргорно тӱмыремын

Кеҥеж кечыже шуэш.

Пагыт мыйын ӱмыремым 

Корзинкаш пыштен куржеш.

Теҥыз воктене

Теҥыз воктене лыҥ калык шолеш - 

Первый гана толшо-влак.

Теҥызше шыдыжым луктын уэш,

Нуным торжан саламла.

Иктылан толкын келша гын,

Вес еҥже штильым вуча.

Мый шочын омыл тышакын -

Вӱдын йочажла чучам:

Ямде улам тудын толкынжым

Талгыдыла сорлыклаш,

Первый гана тышке толшыжым

Толкын оржашке шындаш

Да наҥгаяш мӱндыр верыш,

Ужшо да палыже чот:

Шинче вучен штилян эрым - 

Тиде вара могай шот?

Шол, мӱгырал, кумда теҥыз:

Куп веле тӱҥын ила.

Теҥыз тӱтаным шер темын

Ужын, 

     Шӱмем юарла. 

Пасу

Ойленыт мылам: пасу шӱм-чонан,

Пуйто айдеме гаяк кумылан.

Пасу кумыл тудо паша верч йӱла,

Пайремым ок чыте ты илыш-йӱла.

Пашам жапше дене пытарыш аҥа,

Да ындыже калык ласканак кана,

Но ыле пасу - 

                  копнаже шала:

Кылта пурташ вийже ыш сите ала? 

 Пӧръеҥ-влак 

          сар корным рошткеныт тӱшкан

Дай вуй ӱмбач бомбо 

                               шоикын шӱшка,

Сандене тунамже 

                         йоча-влак гына

Ава пелен кайышт пасушкына.

Тул деч лӱдмӧ семын тыгай аҥа деч 

Лӱдам да,

Кӱлеш гын, виемым,

Вуемым

Пуэм мый кечан пасу верч. 

Мыйын илышем

Мыйын илыш - кӱртньӧ гае:

Лач пашаште ягылга.

Паша деч кораҥын кае -

Рӱдаҥеш да шолдырга.

Илыш - шахматын оҥаже:

Ошо, шеме - йыгыре.

Куан,

     кочо ойгынаже

Йыгыре илат эре.  

Мӱкшын таҥже

Тачат чучам изи мӱкш семын:

Кӱлеш гын, клевырыш шинчам,

Висвис тӱтаныште ошемын,

Яндарештеш изи шинчам.

Палем поэтын пӱрымашым - 

Таҥлалтын, мӱкш дене илаш:  

Пуста почеламут карашым

Мутан перге дене темаш.