30 март - Мландым аралыме кече. Мланде

Ик палыме ойлыш тыгайым.

Каласыш - умша пылыштӱҥыштӧ:

«Палет, шинчынам мый тул кайыкыш,

Наҥгайыш каван рӱдӧ-рӱдышкӧ.

Эскерышым кӱшыч тӱням.

Тыгайым пален омыл ончыч,

Эсогыл омеш вара кончыш.

Эҥерым, пасум ужынам,

Чаманышым мыскынь ялнам.

Да ял веле мо?..

Олажат…

Шоналтет - 

Кидкопашке пура.

Айдемыже, ой, товатат,

Сайрак ончалат гын - пурак!

Тыгайым кеч нал, ит нал шотыш,

Садикте перна шинчалан.

Шинчат гын тыят самолетыш,

Ончен мошто кӱшыч тӱням!»

«Ончен мошто кӱшыч тӱням...»

Но кӱшкӧ кӱзат мландӱмбачын.

Кавашке кӱзаш шочыт мландыште.

Эсогыл пун-кайык шара шулдыр-вачым

Ача-аван шочмо аланыште.

Чоҥештылше кайык - юж теҥызын сакче.

Пӱралтын кеч шулдыр тудлан,

Каваштат ок мондо шке мландыжын акшым,

Кава гычат мурым мура мландылан.

Сандене со йоҥгышо семыште данле

Пиал моктеммуро шокта.

Тугеже, эн первыяк мланде гыч мландым

Аклен моштыш кайык, акла каваштат.

Тугеже, эн первыяк мланде гыч мландым

Аклен да жаплен моштыман.

…Мый ужым, кузе пеледеш ошын ландыш,

Палем: 

             пелйӱдлан агытан мурыман.

Паша деч вара лиеш волгыдо каныш,

Пайремым пайрем ыштыман.

Мый ужым, палем жапын тӱсшым,

Мо поро, осал - таҥленам.

Мый подыльым теҥызын вӱдшым,

Мый ончышым кӱшыч тӱням.

Мый ончышым кӱшыч тӱням!..

Юж теҥызым пӱчкын, «Ил»-кайык

Ола, ял ӱмбач чоҥешта.

Заводын чал шикшыже лайыкын

Кавашке нӧлтеш, шоҥешталт.

Вот ял, кумылаҥын пашаште,

Шӱла уло оҥын тӱнян шодыж дене.

Шижам, чонжо калыкын кумыл кашташте;

Шижам, чонжо калыкын муро ден темын.

Но кушто вер-шӧр, кидкопаш пурышашлык,

Куш йомыныт мыскынь ялла?..

О Мланде! Чучат тый пеледыш аршашла,

Айдеме - Онар Патырла.

Сандене манам гын мый: мланде гыч мландым

Изиш да моштем гын аклен,

Ончалза туран шинчашкемже ӱшанлын,

Ончалза, мыят ончалам чон жаплен.

Тыге дыр эре: от эскере шеҥгеке -   

Вияш ок лий ончык корнат.

Но верышке толын шумеке, 

Эше ик гана шойыкет савырнал,

Вет тачысе кече гыч ончык, эрлашке,

Ужаш ман, теҥгечысым раш палыман.

Уке гын кеч шӱдыр дек кӱзӧ кавашке,

Кеч Тылзе гыч, Марс гыч ончал тый тӱням -

От уж нимомат, нигунам!

От кол нимомат, нигунам!

Сандене ялетым, кушан шочынат тый,

Пӱртӱсым, кушан кушкынат,

Рӱпшалтме шепкатым, воктенже аватым

Тый шарне, ит мондо ик тапырланат.

Пагале да акле, да жапле

Элетым, тӱням, уло мландым.

Ыштет гынже тидым

                                   куатлын,

                                                   суаплын,

Кеч теҥыз гыч, юж гыч ончал мландынам - 

Ужат тудым порым, эсеным, шымам.

Но иктым эреак шарнен илыман:

Тидланже эн первыяк мланде гыч мландым

Ончен да жаплен моштыман.