Ямле пагыт

Адак ик ямле пагытым шарнальым…

Ош лумым сурык вученна тунам.

Шем лавырам леведын, теле толын, 

У ий, каникул, лум - могай куан!

Лумгурчакет шога, ведрам упшалын,

Мӱндыркак кешыр нерже койылда. 

Тӱрвым нулал тамлаш толшо мераҥым

Капка йымач пий шыдын лӱдыкта.

Йоча-влак курыкыш кӱзат-волалыт,

Издер да ече дене мунчалтат.

Моктаныме йӱкат шокта: «Мый - курык патыр!»

Да тыманмеш ты патырым шӱкал волтат.

Эҥер ӱмбак ала воштончыш возын? 

Кече вашеш ий шийын чолгыжеш.

Йоҥга тораш: «Гол!», «Шайба!», 

                                            «Штанга!», «Огыл!»

Хоккей гыч каратэ кырт ылыжеш...

Но тиде ямле пагыт ожно лийын...

«Гаджет» манмеш «кылдалтын» йочана.

Лач шып кастен, ече тоям кучалын,

Каят урем дене коча-кова.

Пошкудо, лек уремыш йочам налын,

Айда меат пырля юарлена!

Шуаралтеш пӱртӱсыштӧ тазалык,

Да шарналташ кодеш йочаланна.