Шыжын пытартыш моторлыкшо

Окна воктенысе куэм

Лыжга мардеж шыман туржеш.

«Лышташ орам, шонет, пуэм?» -

Куэ лӱҥгалтын воштылеш.

Мардеж, сырен, умбак куржеш,

Тошкен кылта ден оралам.

Пич лапыште йымен возеш,

Лиймеш виян да озыркан.

Окна воктене шыже йӱр

Куэм йӱд-кечыже мушкеш.

«Лышташемлан ынде от кӱл», -

Пушеҥге йӱрым воштылеш.

Но шыже покшымым вакшеш,

Укшлажым йӱштын шупшалеш…

Парчам сакен, куэ шортеш:

«Кунам кеҥеж уэш толеш?»