Илыш - пӧлек

Кораҥ умбаке, йӱд пычкемыш,

Йыштак ит ончо мый декем.

Ужнем эше тӱнян чевержым,

Илен коднем чон келанен.

Рӱпша кава алалге пылым,

Ал пуш ал толкын ден иеш.

Шыман вӱдсерыш кидшым шуйыш,

Ал шовыч дене леведеш.

Ах тиде тат могай сӧрале!...

Ок лийыс тудым чараклаш.

Шыҥен мурсемла чоныш пурыш,

Эн тамле омышто кончаш.

Эрталше кечым ужаталын,

Кечат шке верышке шылеш.

Кас ӱжара тунар чевергыш,

Шулен шып, помышыш ӱжеш.

Ме улына пӱртӱсын шочшо,

Радамже илышын тугак:

Шочат, кушкат пеледыш семын,

Илет-илет да… шоҥгемат.

Мыняр шуйна тошкалме корно,

Товат, ок лий ондак палаш.

Шуйна тек волгыдо йолгорно,

Яндар памаш воктек волаш.

Тӱняште, муын чын шке корным,

Илаш - айдемылан пиал.

Кава гыч шуйымо пӧлекым

Ит мучыштаре, кидыш нал.

Айдеме кумыл - поро шӱлыш,

Келшен илаш тӱняште сай.

Поянлык верч чонет ит кӱрышт,

Пелен вет тудым от наҥгай.