-30 °С
Пылан
Все новости
Сылнымут аланыште
6 Июнь 2025, 16:59
«Шурно вальс»
Кажне еҥын школышто тунемме жапше ӱмыр мучкылан ушешыже, шӱмешыже шыҥен кодеш. Ме Тынбай ялысе кыдалаш школышто 1962-1970 ийлаште тунемынна. Икымше классыш латшым ӱдыр да эрге тунемаш мийышна. Тудо пагытыште Благовещенск педагогический училище гыч студент-влак практикыш толыт ыле. 1969-ше ийыште Надежда Шайбаковна (Тынбай ял ӱдыр, кызыт Кутлусатова улеш), Олег Яковлевич Каликаев (Дӧртыльӧ район Чарлак ял гыч), Валерий Николаев толыныт. Вес ийжылан Мефодий Иванович Петров миен.
В. Исенеков.1953 ий. Редакцийын архивше гыч налме фото.
Олег Каликаев ден Валерий Николаев тале баянист ыльыч, нуно тӱрлӧ мурым туныктеныт. Тетрадьыштем 5-ше февральыште (1969 ий) «Шурно вальс» муро возалтын. Почеламутын да семын авторыштым ончыктымо огыл. Тиде мурын семже южгунам вуйыштем пӧрдеш. А мурын авторжо-влакым нылле ий утла эртымеке гына пален нальым.
Почеламутын авторжылан, ила гын, тений 19 мартыште 90 ий темеш ыле. Тиде Удмуртийысе Шопкер ялеш шочын-кушшо Валентин Борисович Исенеков. Семжым Киров областьыште шочшо марий Дмитрий Кульшетов келыштарен. Валентин Исенековын почеламут сборникшым Елена Борисовна Каликаева (Исенекова) ончыктен ыле. Тиде сборникыште палыме почеламутымат муым, тудо «Эрдене кеҥежым» манылтеш.
Гельсий Зайниев «Кӱкшака» книгаштыже писатель, поэт, драматург-влак нерген возен. Валентин Исенеков нергенат возалтын: «А кузе шарналташ огыл тыште В. Исенеков ден Д. Кульшетовын «Кеҥеж эрдене пашаш» мурыштым! Тудо марий яллан, мотор пӱртӱслан моктеммурылак чучеш, кумылым шулдыраҥда». Тиде почеламутым В. Исенеков 1953-54 ийлаште возен. Мыланна «Шурно вальс» мурым практикант Валерий Николаев туныктен. Семже дене вальсым кушташ пеш сай. Почеламутым лудса, тунам умыледа - тиде произведенийлан «Кеҥеж эрдене пашаш», «Эрдене кеҥежым» да «Шурно вальс» лӱмат келша.
Шем солыкшым писын
рудалын,
Шарлале чевер ӱжара,
Вӱргенчыкшым кок век
рӱзалын,
Пич йӱдым умбак чактара.
Мӱй пушым шаралын,
пистерже
Адак ужарген шогалеш.
Тыпланыш воштончыш
гай ерже,
Эр кечым шыман ончалеш.
Мардеж тарванен
вондерла гыч,
Лектеш лышташлам
кожгален.
Мурат йывыртен
кайык-шамыч,
Пӱртӱсым йырваш ылыжтен.
У шурно лӱҥга омыж семын,
Парчажым сава калыклан.
Куан дене шӱм тичак темын,
Шогална пашашке чылан.
Моткоч йӧратем
кеҥеж эрым,
Куан тул йӱла шӱмыштем.
Эн чот йӧратем
мый элемжым,
А эл - пиалем, илышем.
Пасун ямже, калыкын поянлыкше - кунам шурно вальсым кушта.
Новости партнеров