21 март - Поэзийын тӱнямбал кечыже

Геройын корныжо

Шуктен шке ратшым, уэш шошо тольо,

Март тӱҥалтыш вел… кече южгата.

Чонна вуча кеч волгыдо куаным,

Ок пу саман - шем тистыжым рӱза.

Мемориал дек калык толын шуко,

Кундем Геройжо ден чеверласа.

Кузе тӱса дыр таче аван чонжо -

Пытартыш корныш эргым ужата.

Каласыш военком виян пеш мутым,

Сар корнышто салтак тидым сулен.

Пытартыш сӧйлан сулымо медальжым

Кучыктыш авалан, вуй савен.

Пытартыш мутым, кумыл тодылалтын,

Туныктышетше ойлыш кугешнен.

Чоным кӱрышт, кажне - тышке толшо -

Шке семынже ты сарым чот карген.

Йоҥгалте гимн. Оркестр почо корным,

Ава ӧндале колоткам, пызнен.

Мыняре тудо Юмо дечын йодын…

Салтак шке эл верч пеҥгыдын шоген.

Чыла сӱрет тӱжвалне… Чонлан кочо…

Эше мынярым ме йомдарена?

Сар корно шучко, но… герой ок коло!

Ме кызыт сеҥымашым таптена!

Памаш

Яндар памаш вӱдсерыш ошкылам,

Памаш мур йӱкым колыштам шыпак.

Тудат толмемым мӱндырч шижылдал

Ӱжеш воктекше мыйым лишкырак.

«Салам, памаш!» - тудлан мый пелештем,

Тудат мылам вашештыш йывыртен.

Шуйна корнет торашке, юарлен,

Сӧрастаралын шочмо вер-шӧрем.

Чын, уло вий куатле чоныштет,

Тый кажным колышт, умылен моштет.

Мыят тылат вел кумылем почам,

Чын ой-каҥашым чоныштет муам.

Товат, улат тый верысе Тӧра,

Вет пӱртӱсат тылат вуйым сава.

Пеледын ломбо тыланет кӧра,

Рӱзен парчажым, корныш ужата.

Вачӱмбалке вӱдварам пыштен,

Ӱд(ы)рамаш толеш, ведрам сакен.

Ару вӱдет ден шӱргым ниялта,

Тазалык верч пӱртӱслан юмылтен.

О, порылык мыняре тый денет!

Яндар вӱдетше илышым пуа.

Торашке йоҥыжалтше ший йӱкет

Шӱм-чоныштем у мурым шочыкта.

Ялем

Шуэракын ужам мые кызыт ялемым,

Кушто эртен эн полмезе жапем.

Кеч илем мый селаште, вич меҥге тораште,

Ужын толаш амал лекмым вучем.

А амалже лектеш гын, шыпак йывырталын,

Корнывожыш лектам шулдыраҥын.

Яндар южым погалын, ласкан шӱлалталын, 

Ял мучашыш шуам ошкылалын.

Теве курык, корем. Шыргыкта Кӧстан вӱдшӧ…

Адакат шарналтем йоча жапым:

Курык шӧрыш ончен, лишемдаш ужар жапым,

Ах, кузе вученна чевер майым!

Тыште калык илен икоян, паша дене,

Мый моктем тусо илышын ямжым.

Сай эрласыш вончаш кушкынна ӱшан дене,

Кораҥден неле-йӧсым теҥгечсым.

Кызыт ял шӱлыкан, мо саман ден авалтын?

Ок лӱҥгалт теҥызла шурно пасу.

Ожсо гай ок волгалт олма сад, пеледалтын,

Ял воктен ойгыра шкет олмапу.

Ынде тымык кастен ок йоҥгалт марий муро,

Ок йоҥыжалт гармонь йӱк оҥгырла.

Кас уремыш модмашке нигӧ огеш вашке,

Ок тарваныл кӱвар, ок ӱж «Кандыра».

Тек ом поч мый капкам аваемын сурт-печыш,

Кеч ончал савырнем изуремым.

Тыште мый кушкынам, 

                               сылне жап ден рӱпшалтын,

Лач тышеч погенам вий-куатым.