Йӧратымашлан верч мом от ыште. Ойлымаш

- Аватым саламлаш налнет?  - лишеммеке, тура йодым. 

Артем тык-мук лие, ончалтышыжым ката нерышкыже виктарыш. 

- Ӱдырлан, - ӱҥышын вашештыш. 

- Ӱдыр пеледышым огыл, ала иктаж-мом кӱлешанракым вуча. - Мый шкеже пайдале настам пӧлеклынемат, тыге маньым. 

- Уке-е, Настялан пеледыш келша, - Артемын умша пылыш марте шарлыш. 

А мый чытырналт кайышым. Но колмемлан ӱшанаш шым тошт - пужен йодым:

- Кӧ-ӧлан?!

- Настялан… От пале мо, тыйын классыштет тунемеш. 

«Тевыс молан перемен еда мемнан класс воктен пӧрдат улмаш. Шиш, тыланет Настя!» - осалын шоналтышымат, Артем ваштареш атакым тӱҥальым:

- Помылавуй Настялан?! Пеледышым кучыктынет? Тудо тидым ок шого! 

- Молан помылавуй? Молан тидым ок шого? - Артемын шинчаже пыч-пыч лие, ӱмбакем тура ончале.  

- Потомушто мӧҥгыштыжӧ эре шала ӱпан коштеш. Чумыр кучаш ӧркана. Школыш толаш гына ӱппунемым пуна. Эше шкежат огыл, коважлан пуныкта. А шӱмжӧ тудын могай йӱштӧ-ӧ… Тыгайым марлан налат гын, пеленже кылмен колет. 

- Мый марлан налме нерген шонен омыл, - ӱҥышын шокта Артемын йӱкшӧ. - …Але келшенат ончен омыл да.

- Пеледышым кучыктет - тудо шкежак воктенет пижын шинчеш. Вара паша марлан налме мартеат тора ок код… - Мый ойлем-ойлем - Артемым Настя деч йӱкшыктарынем, но Артем пеледыш витрине деч кораҥаш ок вашке. 

- Тудо, палет, мыняр шуко кочкеш! Эрдене ик сукыр киндым конда, школ гыч кайымешке, чыла кочкын пытара. Тыгай ӱдыр ватылан логалеш гын, пукшен йомат. 

Артемын шинчаже адак пыч-пыч лие. А мый тулышко эшеат кугурак оргажым кудалтем: 

- Настя - пӱтыремпоч! Классыште шкенан рвезе-влак ончылно почшым пӱтыркала, а кастене кугу ийготан рвезе-шамыч пелен селашке дискотекыш кудалыштеш. - Тиде оемжым лӱдынрак каласышым. Артем шоям вӱдылмем тогдая, шонышым. Уке, ыш тогдае. - Тудо кугу ийготан рвезе-влак дене дискотекыш гына огыл кудалыштеш, а нунын дене… мала. 

Артем кенета кокыралтыш, укшинчыш толмым шижмыла, кидкопаж дене умшажым петырыш. Пыртак тыге шогыш. Но мылам ваштареш ик шомакымат ыш пелеште, тугеже Настя верч ӱчашаш ок пиж. 

- Мый вет тыгай улмыжым пален омыл, - омса дек ошкылшыжла вудыматымыжым кольым. 

- Вот ынде «палет», - почешыже шыпак пелештышым. Мыят ынде шонымем вашталтышым: пайдале настам налме олмеш пеледышым ончышташ пижым. «Настя пеледышым йӧрата», - Артемын каласыме ойжо ушыштем кечен. 

Кандашымше март кечын кондымо аршашем Настялан кучыктышым. Тидым Артем ужо. Но Настя куан да ныжыл ончалтышыж дене мыйым гына ужын да мыйым гына ончен.