Вÿдоҥго

Легылден ÿдыр Тöргым турашке,

Вашкыде олык дене вола.

Лишемеш эҥер деке, ок вашке,

Шонкален, ший гай вÿдым тÿсла. 

Шыжыктен йырже чинче ден шийым,

Кумдыкеш толкын эркын шарла,

Лупшалтеш сер ÿмбак, налын вийым,

Пералтеш да пеш писын шула.

Шинчылден ÿдыр сер ÿмбал кÿыш,

Йогынлан сылне семым шокта.

Шоныш толкынла мÿндыркö кÿзыш,

Шÿмжö жапым - вÿд оҥгым шотла.

Кÿрлын налме ош ломбо орлаҥгым,

Иктын-иктын эҥерыш шола.

Ломбо пуш ден, ошлум гай чияж ден

Толкынеш таҥжын лÿмжым воза.

Шкет ломбо

Адакат мые шкетын кодальым

Пелед шогышо ломбо воктен.

Тыйже маньыч: «Толам, ом ондале:

Жап шуэш - ужына шып кастен».

Выж мардеж шалата ÿппунемым,

Леве юж ниялта чурием.

Сылне ломбо пала шÿлыкемым,

Колыштеш шÿм гыч лекше мурем.

Мый вучем, а йырваш тугак тымык,

Йÿк-йÿан огеш кÿрл шонышем.

Лач лышташ-влак гына йыштак, шыпак,

Ойлынешт ала-мом мыланем.

Адакат шогылдем мые шкетын

Пелед шогышо ломбо воктен.

Вученам, монденат мыйым шке тый,

Еҥ пиалым от кучо поктен.