Поэзий кумыл

Вӱд чӱча
 
Шолапеш кержалтше ийым
Кече шокшын ырыкта.
Савырен яндар вӱд чинчыш,
Корным шошылан ышта.

Тӱрволак гыч вӱд чӱчалтыш

Куржыт ӱлык почела, 

Йӱштӧ мландым лум йымачын

Ырыктен лукташ тӧчат.

Ош-кандалге лаке вӱдым

Сарси тамлен подылеш, 

Тауштен кавасе шокшым,

Чоҥешталын кӱзалеш.

Чаҥажат, шуҥгалтын лакыш,

Шошо вӱдеш чывылта,

Пала, эр марте чӱчалтыш

Шиян ийыш савырна.

Вараш кодшо лум

Вожылалын, эплынрак

Лум тӱҥале эрденрак.

Ошо, пушкыдо, шыма,

Ончалат - шинчат йыма.

Пӧрдын-модын, шып велеш, 

Эркын мландым леведеш.

- Ит ӧр вараш толмемлан, 

Виге леведам каслан.

Шуко вученат, палем, -

Нойышо мландылан ойла, -

Шокшын-шокшын вӱдылам,

Погет алым шошылан.

Илем

Илем… Шочынам да илем, 

Илем, Юмо чоным пуэн,

Илем, йӧратен илышем,

Илем, тукым шӱртым шуен.

Илем, ош тӱням волгалтен, 

Илем, кечылан куанен,

Илем, авамлан тауштен, 

Пӱрымашем ден кугешнен.

Илем, тыланет эҥертен,

Илем, икшывем арален, 

Илем, тӱрлӧ нелым сеҥен,

Илем, порым вел сугыньлен.

Лышташ сӱан

Йошкар, ужарге, саре,

Кӱрен да ал тӱcан, 

Чоҥештылыт - от чаре,

Уэш лышташ сӱан.

Вӱчкен леведыт мландым

Лай шӧртньӧ тӧшак ден,

Муралыт ныжыл семым

Шыве-шыве, кыжген.

Ончем йырем моторым,

Шӱлен-шӱлаш тоштде,

Латшым ияш жапемым

Конден лышташ, шижде.

Погем сӧрал аршашым,

Лышташ йӱр ден модам,

Тамлен ончем иктажшым, 

Пырля чӱчкен пӧрдам.