21 март - Поэзийын тÿнямбал кечыже. Шошо муро

Шокшо вер гыч, коден тора элым,

Кайыквусо кундемыш вашка.

Сӧрастарыш йырваш, оза семын,

Вашлиймашыш у Шошо вуча.

Тый кушеч кызытак толын лектыч?

Ала тиде лач омо конча?

Мый куржам ваштареш, кид шуялын,

Ончылнем сылне шошо чÿчка.

Талантан кундемем

Кундемем эн сылне, поро,

Кундемем - талант памаш.

Шуко шочын илыш муро,

Ятыр кодын шарнымаш.

Чолга шӱдыржӧ Ялкайнын

Вуй ӱмбалне курымлан.

Волгалтара чапле корным,

Вийым пуа тукымлан.

Пӱрӧ ял гыч Бикын корно

«Шӱм саска» ден чаплана.

Искандаровын мурсемже

Кажнын чонышто йоҥга.

Нунын верчын нӧлтеш кумыл,

Чон ӱжеш мураш тугак.

Керте шижын кумылемжым,

Шулдыраҥдышыс Эмгак.

Муро - юзо вий

Ит ӧр, йолташ, ит ойло шыдын:

Жап огыл кызыт пайремлан.

Саман, тылат колтем ÿжмашым,

Мый муым жапым мурылан.

Чын, уло мурын юзо вийже,

«Я - русский» кумылым нȍлта.

Салтакым кугу сеҥымаш верч

Атакыш лÿддымын вÿда.

Кунам кÿлеш шукташ жап йодмым,

Пырляшке вийым чумыраш,

Виян йоҥгалтше чапле муро

Полша кÿ курыкым сеҥаш.

Темда гын шÿлык кумылетым,

Ит лÿд, муралте - чон лушка.

Пайремлан ямжым, илаш вийым,

Ӱшаным муро пӧлекла.

Ломбо пелед эртыш

Ломбо пелед эртыш,

Олма сад волгалте.

Сирень тӱрым тӱрлыш,

Сылнын пеледалт.

Шижынат шым шукто,

Ужынат шым шукто,

Чевер шошо йомо,

Жап ден вӱдылалт.

Ах, кеҥеж-таҥемже,

Ошкыл пеленемже.

Оҥгырвуй пеледыш

Лийже пӧлеклан.

Шыматен ончальыч,

Ныжылгын ӧндальыч

Да памаш кӱварыш

Коштыч тый молан?

Эртыш йӱштӧ теле,

Кеҥежат эртале.

Шем шыжын чурийже

Шулыш тӱтыраш.

Ом сӧрвале жапым,

Ом кычал кышатым.

Мылам огыл мурым

Шӱшпыклан мураш.

Шижынат шым шукто,

Ужынат шым шукто,

Рвезе пагыт йомо,

Жап ден ӱштылалт.

Чон сандалык

Шочынам мый ялеш 

                             ӱжаран шып эрдене,

Тӱня ямде кунам шошылан вуй саваш.

Садланак дыр ом керт мурыде 

                                       илыш верчын,

Чон ӱжешыс лӱдде 

                           вочшо корным эрташ.

Мом кертам гын, ыштем, омак керт - 

                                            ом тавале,

Кеч шӱртнем-кынелам, 

                              пеҥгыдем ошкылам.

Уло мыйын йолташ, 

                        Муза - шӱм пелашемже,

Эн ондак шӱм-чонем

                           лач тудлан вел почам.

Умылем мый, молан толынам 

                                           ош тӱняшке,

Поро сугынь ачан ок мондалт 

                                               нигунам.

Ӱдырамашын паша суапле тӱняште,

Тидым мые алят чын шукташ тунемам.

Йӧратен шке элем, 

                             пагалем калыкемым,

Уло мыйын шочшем, 

                              нунылан мый кӱлам.

Муро ден сӱретлем 

                     шке жапемын портретым,

Тиде мыйын сандалык, 

                                мыйын веле тӱням.