Пӧкленде ялем

Илемым моштен ойыреныт,

А пӱртӱс - лач йомакысе лай:

Эҥер, чод(ы)ра, ужар олык,

Пасу волгалтеш салма гай.

Ял воктен нӧлталтеш Оляш курык,

А йымач - ший памаш шыргыкта.

Нумалеш калыкем юзо вӱдшым,

Подылмек, вий-куатым пурта.

Калыкнат Ленде ден  Пӧкла гае

Ваш келшен, ик ой дене ила.

Вашлиеш ӱжарам эр эрдене,

А кастене шыпак ужата.

Тыршалеш изи мӱкш гай пашаште,

Муэш жапым тыгак каналташ.

Паша дене сурт сомыл коклаште

Шочмо ялым тырша тӱзаташ!

Калыкем, лий таза да йомартле!

Йылмынам ит мондал нигунам.

Тек лиеш тыныс илыш тӱняште,

Тек ялна ӱмыр мучко ила.

Шольымым - Владимир Айбашевым - шарналтен…

Чолга шӱдыр

Витле вич ий ончыч ты тӱняшке

Шочыктен ава изи ньогам.

Ешаралтын шӱдыр кас каваште!

Кушкын рвезе чулымын, чолган.

Изинек гармоньым кидыш налын,

Шуко пайремлам сӧрастарен.

Сай тунемын, шинчымашым налын,

Пашамат эре тыршен ыштен.

Витле ий лӱмгечыш чумыргеныт

Еш, йолташ, родет да пошкудет.

Гармонь семешет чылан куштеныт,

Ӱшаненыт - эше юбилейыш чумырет…

Ме тачат погынена, но шӱгарлашке,

«Шужо Владиклан», -  пелештена.

Лий узьмакыште да кошт саска 

                                              коклаште,

Йӧратыме Владик шольына!

Шарналтена тале гармонистым,

Еш озам, пошкудым да ачам,

Сай йолташым, шольым, активистым,

Мыскарачым да йӧратыше кочам.

Витле вич ий ожно ты тӱняшке

Шочыктен ава изи йочам.

Шинчавӱд ден ончена ме кас кавашке -

Огеш чолгыж шӱдыр тылетла.