Сылнымут аланыште

Сылнымут -  шочмо йылмын поянлыкшылан эҥертен, шке шонымым образ гоч почын пуаш кучылтмо йӧн. 

Почеламут, шӱм-чон шижмашым ылыжтен, лудшо еҥын илыш умылымашыжым кумдаҥда да чонешыже поро койышым шава гын, тудым сылнымут семын аклаш лиеш.

Тыгай «Сылнымут алан» самырык тукымлан шочмо йылмым да уш-акылым вияҥдаш полша. Марла возен, лудаш йӧратен гына йылмынам арален коден кертына, тунам калыкнат илаш тӱҥалеш. «Чолман» газетын тӱҥ редакторжо И. Губаев тидын нерген ойлымыж годым шкенжын школышто изирак класслаште тунемме жапыштыже Йошкар-Ола гыч лӱмлӧ марий писатель-влак Семен Вишневскийын, Семен Николаевын, Александр Юзыкайнын толмыштым, йоча-влак дене оҥай вашлиймашым эртарымыштым ушештарыш, кузе нунын, тыгак марий поэт Альбертина Иванован самырык авторын ончыкылык сылнымут илышыштыже кышажым пеҥгыдемдаш полшен шогымышт, Марий писатель ушем пелен самырык-влак дене пашам ыштыше пӧлкаште, «Литератур шыже» семинарлаште усталыкшым шуарымыже  нерген каласкалыш. Усталык корным таптымаште кугурак йолташыже-влакын эҥертышышт Игорь Ивановичлан мемнан республикыште шочмо йылме дене «Чолман» газетым Нефтекамскыште лукташ кумылаҥден - тидын нерген ойлымыжым тӱткын колыштыныт да йодыш-влакым пуэденыт.

Мишкан районысо Чорай марий гимназийыште марий йылмым туныктышо А.Л. Юзукбаеват школышто тунеммыж годымак сылнымутлан шӱмаҥмыж нерген палемдыш, почеламут-влакым тунамак возгалаш тӱҥалын. Усталык кумыл студент жапысе илышыштыже тудым эше утларак авалтен, мурашат йӧратен, йолташыже-влак дене пырля  «импровизаций сценым» шонкален лукмышт нерген пеш оҥайын каласкалыш. Туныктымаштыжат творческий йӧн-влакым кучылтеш, йоча-влакым усталык корно дене вӱда. 

Л.А. Русиева сулен налме канышыште улеш, ӱмыржӧ мучко Чорай гимназийыште марий йылмым да литературым туныктен. Тудынат поэзий памашыже изинек почылтын, а вара Йошкар-Олаште тунеммыже, студент йолташыже-влак дене пырля сылнымут аланын «тамжым» пален налмыже нерген  чон почын кутырыш. Почеламут сборникым лукташ таратыше да полшышо семын Вячеслав Абукаев-Эмгакым порын шарналтыш.  

Усталык корным лончылымо погынымашыште Елтек ялын шочшыжо, Уфа оласе шанче да технологий университетын (УУ НиТ) Бирскысе филиалжын пашаеҥже Г.Д. Сайсановат лийын. Школышто тунемме чолга жапшым ялчыже да туныктышыжо-влак дене пырля шарналтеныт. Галина Даниловна тунеммаштат, мер пашаштат эре примерым ончыктен. Шочмо йылмылан шӱмаҥдыше туныктышыжо М.Н. Адылгареевалан кугу таум каласыш да погынышо-влаклан ныжыл мурым пӧлеклыш.

Ты вашлиймаште тунемше-влак мутмастар-влакын илыш корныштым, чумыр творчествыштым пален налыныт. Тыге шинчаваш ужын кутырымаш йоча-влакым сылнымут тӱняш келгынрак ончалаш кумылаҥда, литератур йылмым палаш, шымлаш да кучылт мошташ туныкта, ӱдыр ден рвезе-влакын творчествыштлан одарланаш йӧным ышта.